Qırğızıstan Respublikasında həyat və cinsi toxunulmazlıq əleyhinə olan xüsusilə ağır cinayətlərə görə ölüm cəzasının tətbiqi ilə bağlı təşəbbüs irəli sürülüb.
Oxu.Az "AKIpress"ə istinadla xəbər verir ki, təklif Qırğızıstanın normativ hüquqi aktlarının layihələrinin ictimai müzakirəsi üçün vahid portal olan "Koom talkuu"da yerləşdirilib.
Təşəbbüsün müəllifi ölkə vətəndaşı Rüstəm Nusupovdur.
Layihədə Qırğızıstan Cinayət Məcəlləsinə dəyişiklik edilərək, istisna cəza tədbiri kimi ölüm cəzasının tətbiqi nəzərdə tutulur. Təklifə əsasən, bu cəza xüsusi amansızlıqla törədilmiş qətl, yetkinlik yaşına çatmayan şəxsin qətli, zorlama və ya cinsi xarakterli zorakı hərəkətlərlə bağlı qətl hallarına şamil olunacaq.
Eyni zamanda, ölüm cəzası yalnız hökmün qanuni qüvvəyə minməsindən və bütün məhkəmə instansiyalarından keçdikdən sonra icra edilə biləcək.
Məhdudiyyət də nəzərdə tutulur - qadınlara və yetkinlik yaşına çatmayan şəxslərə qarşı bu cəza tədbiri tətbiq olunmayacaq.
Təklifdə qeyd olunur ki, yetkinlik yaşına çatmayanlara qarşı qətl və zorakılıq hallarının artması mövcud cəza tədbirlərinin kifayət etmədiyini göstərir. Belə hallarda ölüm cəzasının tətbiqi cəmiyyətin müdafiəsinə, cinayətlərin qarşısının alınmasına və cəzanın qaçılmazlığı prinsipinin möhkəmləndirilməsinə xidmət etməlidir.
