"Avropa Rusiyaya qarşı uğurla mübarizə aparması üçün taktiki nüvə silahına sahib olmalıdır".
Oxu.Az "Reuters"ə istinadla xəbər verir ki, bunu "Airbus" Direktorlar Şurasının sədri Rene Oberman Berlin Təhlükəsizlik Konfransında bəyan edib.
O, Avropa İttifaqının (Aİ) düz qapısının ağzında Rusiyanın Kalininqrad vilayətində, habelə Belarusda "İsgəndər-M" əməliyyat-taktiki raket komplekslərinin yerləşdirilməsini qitə ölkələrinin "Axilles dabanı" adlandırıb. Obermanın fikrincə, bu silahlar Avropaya ciddi təhlükə yaradır.
"Almaniya, Fransa, Böyük Britaniya və Aİ-nin üzvü olan digər əlaqədar dövlətlər ilk növbədə taktiki səviyyəli və mərhələli vahid nüvə çəkindirməsi proqramı barədə razılığa gəlməlidirlər. Düşünürəm ki, bu, çəkindirmənin sanballı əlaməti olacaq", - deyə "Airbus"un başçısı bildirib.
Bildirilir ki, hazırda Avropanın ümumi çəkindirmə doktrinası yoxdur. Fransa və Böyük Britaniyanın öz nüvə cəbbəxanaları (müvafiq olaraq 290 və 225 döyüş başlığı) var, lakin onların taktiki silahları yoxdur. Almaniya NATO-nun nüvə mübadiləsi proqramında iştirak edir, lakin nüvə silahına malik deyil. Stokholm Beynəlxalq Sülh Araşdırmaları İnstitutunun (SIPRI) hesablamalarına görə, Rusiyanın nüvə cəbbəxanasında 4 309 döyüş başlığı var.
