İsrail Müdafiə Ordusu (SAXAL) Qəzza zolağında HƏMAS hərəkatının iki nümayəndəsinin zərərsizləşdirildiyini bəyan edib.
Oxu.Az xəbər verir ki, bu barədə SAXAL-ın "Telegram" kanalındakı məlumatda bildirilir.
"Keçən həftə Qəzza zolağına endirilən dəqiq zərbə nəticəsində İsrail Müdafiə Ordusu HƏMAS və "İslam Cihadı" terror təşkilatlarının hərbi qanadlarının üzvləri olan Hüseyn Kadra və Məhəmməd Farrunu zərərsizləşdirib", - deyə məlumatda vurğulanır.
SAXAL-ın məlumatına görə, Kadra və Farru HƏMAS tərəfindən idarə olunan və Qəzza zolağına vəsaitlərin köçürülməsinə cavabdeh olan maliyyə şəbəkəsi daxilində fəaliyyət göstəriblər.
"Şəbəkəyə rəhbərlik edən Kadra Farru və digər iştirakçılarla birlikdə HƏMAS rəhbərliyinin göstərişi ilə HƏMAS-ın hərbi qanadının ehtiyacları üçün yarım milyard şekeldən (təxminən 135 milyon dollar) çox vəsaitin köçürülməsinə şərait yaradıblar", - deyə məlumatda qeyd olunub.
Qeyd olunur ki, HƏMAS bu vəsaitlər hesabına, xüsusən də son aylarda öz terrorçularına maaş ödəməyə və SAXAL bölmələrinə, eləcə də İsrail vətəndaşlarına qarşı terror aktlarını maliyyələşdirməyə davam edib ki, bu da atəşkəs sazişinin pozulması deməkdir.
