Rəsmi Pxenyan bu həftə ərzində bir neçə silahın sınağını reallaşdırıb.
Oxu.Az xəbər verir ki, bu barədə Koreya Mərkəzi Xəbər Agentliyi (KCNA) məlumat yayıb.
Bunların sırasına elektromaqnit silah kompleksi və taktiki ballistik raketin döyüş başlığı daxildir.
Koreya Xalq Demokratik Respublikası (KXDR) hərbi qüvvələrinin həyata keçirdiyi yoxla atışları zamanı müəyyən edilib ki, "Hwasongpo-11a" raketi 6.5-7 hektarlıq sahəni darmadağın etmək gücünə malikdir. Həmçinin mobil zenit-raket kompleksi və karbon lifindən hazırlanmış bomba maketləri də sınaqdan keçirilib.
Cənubi Koreya tərəfinin açıqlamasına görə, Şimali Koreya Yapon dənizi istiqamətində qısa mənzilli bir neçə raket atıb. Buraxılan raketlər təqribən 240 km uçuş məsafəsi qət edib. Bildirilir ki, bu, Pxenyanın cari il ərzində həyata keçirdiyi dördüncü ballistik raket sınağı hesab olunur.
