Münhendə avtomobili insanların üzərinə sürən şəxs həbs olundu

Münhendə (Almaniya) insanlara qəsdən hücumda şübhəli bilinən şəxs həbs edilib.

Oxu.Az xəbər verir ki, bu barədə DPA agentliyi şəhər prokurorluğuna istinadən məlumat verib.

Qeyd olunur ki, 24 yaşlı Əfqanıstan vətəndaşı 39 nəfəri öldürməyə cəhddə şübhəli bilinir. İstintaqın məlumatına görə, hadisəni törədən şəxs Almaniyada qanuni yaşayıb və insanların üzərinə sürdüyü avtomobil özünə məxsus olub.

İstintaq müəyyən edib ki, cinayət qəsdən törədilib və şübhəli şəxsdə psixi pozğunluq əlamətləri müəyyən edilməyib.

17:40

Fevralın 13-də Almaniyanın Münhen şəhərində 24 yaşlı əfqan Fərhad N.-nin həmkarlar ittifaqının keçirdiyi nümayişlərin iştirakçılarının üzərinə avtomobil sürməsi nəticəsində 36 nəfər xəsarət alıb. Xəsarət alanlardan ikisinin, o cümlədən iki yaşlı uşağın vəziyyəti ağırdır.

Oxu.Az "Bild" qəzetinə istinadla xəbər verir ki, hadisədə şübhəli bilinən Fərhad N. bu gün məhkəmə qarşısına çıxarılmalıdır. Onun hərəkətlərinin motivi barədə az məlumat var. Almaniyada qaçqın statusunda olan Əfqanıstan doğumlu şəxsin psixoloji problemlərdən müalicə aldığı bildirilir.

Almaniya Kansleri Olaf Şolts söz verib ki, o, cəzalandırılacaq və Əfqanıstana deportasiya ediləcək.