İnsanlar artıq süni intellekt (Sİ) agentlərindən təkcə peşəkar fəaliyyət üçün deyil, həm də şəxsi ehtiyacları üçün daha tez-tez istifadə edirlər. Belə ki, 2025-ci ildə bu sistemlərə ünvanlanan müraciətlərin 55%-i fərdi məsələləri, cəmi 30%-i isə işgüzar tapşırıqları əhatə edib.
Oxu.Az xəbər verir ki, bu barədə rusiyalı mütəxəssis Roman Duşkin Harvard Universiteti və "Perplexity AI"nin araşdırmasına istinadən Gazeta.ru-ya açıqlamasında bildirib.
"Sİ agentləri standart çat-botlardan onunla fərqlənir ki, onlar yalnız sualları cavablandırmır, eyni zamanda məlumatları müstəqil şəkildə axtara, analiz edə və hərəkət ardıcıllığını qura bilirlər. Sİ agentinin əsas üstünlüyü onun daha yüksək müstəqillik səviyyəsidir. Çat-bot reaktiv bir vasitədir: sorğunu qəbul edir, işləyir və cavab verir. Agent isə tapşırıq aldıqda ardıcıl addımlar planı hazırlayır, onları icra edir, nəticələri təhlil edərək öz planına düzəlişlər edir", - deyə Duşkin izah edib.
Onun sözlərinə görə, hazırda Sİ agentlərinin ən çox tətbiq olunduğu ssenarilərdən biri mövzuların dərindən öyrənilməsidir: istifadəçilər bu sistemlərdən tədris materiallarını ümumiləşdirməyi, yeni qanunla bağlı məlumat toplamağı, arayış hazırlamağı, bazar araşdırması aparmağı və ya tanış olmayan bir məsələni aydınlaşdırmağı xahiş edirlər. Duşkin bu tendensiyanın populyarlığını Sİ agentlərinin intellektual əməyin ən ağır və vaxtaparan hissəsini öz üzərlərinə götürməsi ilə əlaqəladirib.
"Agent dərin analitika rejimində fəaliyyət göstərdikdə, ona tapşırığı çox sadə formada vermək mümkündür. Məsələn: analitik hesabat hazırla. O, cəmi 15 dəqiqə ərzində mövzu üzrə məqalələr tapır, oxuyur, strukturlaşdırır və yekun sənəd təqdim edir. Mən sadəcə bir neçə dəqiqə göz gəzdirərək problemin mahiyyətini anlayıram", - deyə ekspert vurğulayıb.
Bununla yanaşı, aparılan tədqiqatlarda agentlərdən konkret həyati məsələlərin həllində də getdikcə daha geniş istifadə olunur. "Alice AI"də agent istiqamətinin rəhbəri İvan Moiseyev qeyd edib ki, sistemdəki "Araşdır" Sİ agentinə daxil olan sorğuların təxminən üçdə biri müəyyən bir situasiyanı anlamaq cəhdləri ilə bağlıdır. Bunlar tibb, hüquq, məişət məsələləri və şəxsi qərarlara aid suallar ola bilər.
"Sorğuların təxminən dörddəbiri isə maliyyə sahəsini əhatə edir: istifadəçilər yığım strategiyasını seçməkdə, investisiya alətlərini müqayisə etməkdə və ya böyük satınalmaları qiymətləndirməkdə kömək istəyirlər. Sİ agentləri insanın onlarla mənbəni müstəqil oxuyub, məlumatları müqayisə edərək strukturlaşdırmalı olduğu hallarda özlərini ən yaxşı şəkildə göstərirlər", - deyə Moiseyev əlavə edib.
