ABŞ Prezidenti Donald Tramp İranla razılaşma təklifinin Tehranın nüvə silahından imtina etməsini və Birləşmiş Ştatlara "nüvə tozunu" təhvil verməsini nəzərdə tutduğunu iddia edib.
Oxu.Az xəbər verir ki, ABŞ liderinin sözlərini Ağ Evin mətbuat xidməti yayıb.
"Bu, bir səhifəlik təklifdən daha artıqdır. Mahiyyət etibarilə onların nüvə silahına sahib olmayacağını bildirən bir təklifdir. Onlar bizə "nüvə tozunu" və istədiyimiz bir çox başqa şeyləri təhvil verəcəklər", - deyə Tramp bildirib.
Məlumata görə, ABŞ lideri "nüvə tozu" deyərkən İranın İsfahan, Natanz və Fordodakı nüvə obyektlərində olan yüksək zənginləşdirilmiş uranı nəzərdə tutur. ABŞ 2025-ci ilin iyununda həmin obyektlərə havadan zərbələr endirib.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
Həmçinin Hörmüz boğazından gəmilərin keçidində ciddi problemlər yaranıb.
Daha sonra İslamabadda tərəflərin ilk görüşü keçirilib.
Aprelin 22-nə planlaşdırılmış ikinci görüş isə baş tutmayıb.
