Qətər əmirinin ABŞ Prezidenti Donald Trampa hədiyyə etdiyi "Boeing 747" təyyarəsinin sığortasının ümumi dəyəri illik 1 milyon dollara çata bilər.
Oxu.Az-ın xəbərinə görə, bu barədə Rusiyanın "Mains" sığorta brokerinin analitikləri məlumat veriblər.
Ekspert təhlilinə əsasən, bu hava nəhənginin maksimal uçuş çəkisi 400-500 ton təşkil edir ki, bu da sığorta təminatının 750 milyondan 1 milyard dollara qədər standart hədlərini müəyyən edir.
"Belə bir təyyarənin mülki məsuliyyətinin illik sığortası təyyarənin donanmanın bir hissəsi və ya ayrıca vahid kimi sığortalanmasından asılı olaraq, 50-250 min dollar arasında dəyişir", - deyə sığorta bazarı ekspertləri qeyd ediblər.
Kasko sığortasına gəlincə, vəziyyət daha çox xərc tələb edir.
"VIP laynerin eksklüziv interyerini və xüsusi avadanlığını nəzərə alsaq, illik sığorta haqqı 1 milyon dollara çata bilər", - deyə analitiklər vurğulayıblar.
Qeyd edək ki, Qətərin Trampa "uçan saray" adlanan təyyarə vermək qərarı barədə mayın əvvəlində məlum olub. Eyni zamanda, ABŞ qanunlarına əsasən, ABŞ federal hökumətinin əməkdaşlarına xarici ölkələrdən 480 dollardan çox olmayan hədiyyələr qəbul etməyə icazə verilir, daha bahalı olanlar avtomatik olaraq dövlət mülkiyyətinə keçir.
