ABŞ Prezidenti Donald Tramp Rusiya-Ukrayna münaqişənin həlli ilə bağlı tezliklə genişmiqyaslı razılaşmanın əldə olunacağını gözlədiyini deyib. Onun sözlərinə görə, bu sənəd yalnız ikitərəfli məsələlərlə məhdudlaşmayaraq bütün Avropaya təsir göstərə bilər.
Oxu.Az "Sputnik"ə istinadən xəbər verir ki, Birləşmiş Ştatların lideri bu barədə Ağ Evdə Rusiya prezidentinin xüsusi nümayəndəsi Kirill Dmitriyevlə görüşdən sonra mətbuat nümayəndələrinin suallarını cavablandırarkən danışıb.
"Razılaşma mütləq baş tutacaq. Bu, təkcə Ukraynaya aid edilməyən, çox böyük bir sənəd olacaq. Onun miqyası çox genişdir. Hətta deyərdim ki, bütün Avropanı əhatə edə bilər. Bu, möhtəşəm və böyük bir razılaşma olacaq, hər kəs bundan məmnun qalacaq", - deyə o vurğulayıb.
Tramp Dmitriyevlə apardığı müzakirələrin detallarını açıqlamaqdan imtina edib, lakin həmin gün Ukrayna tərəfi ilə heç bir təmasın olmadığını qeyd edib. O əlavə edib ki, münaqişə kifayət qədər tez yekunlaşacaq. Tramp və Dmitriyev arasındakı görüş ABŞ-nin birinci xanımı Melaniya Trampın humanitar təşəbbüsünün davamı olub. Bir müddət əvvəl o, Ağ Evdə Rusiya Birbaşa İnvestisiyalar Fondunun (RBİF) rəhbərini, Rusiya ombudsmanı Yana Lantratovanı və Ukrayna nümayəndələrini qəbul edərək, Dmitriyev vasitəsilə Rusiya lideri Vladimir Putinə məktub göndərmişdi.
Bundan əvvəl ABŞ prezidentinin xüsusi elçisi Stiv Uitkoff Rusiya və Ukrayna arasında Vaşinqtonun vasitəçiliyi ilə noyabrın 10-11-də Əbu-Dabidə üçtərəfli danışıqların keçiriləcəyini açıqlamışdı. Prosesdə Uitkoff və Kuşnerin iştirakı nəzərdə tutulur. Xüsusi elçi bildirmişdi ki, diqqət mərkəzində müharibədən sonrakı təhlükəsizlik mexanizmləri, gərginliyin azaldılması, humanitar addımlar və sülhə doğru növbəti mərhələlər olacaq. Rusiya Prezidentinin mətbuat katibi Dmitri Peskov isə qarşıdan gələn üçtərəfli danışıqlarda Rusiya nümayəndə heyətinə Vladimir Medinskinin rəhbərlik edəcəyini açıqlamışdı.
