"Trampın seçki kampaniyası zamanı və hakimiyyətə gəldikdən sonra ən mühüm hədəfi Ukraynada atəşkəsə nail olmaq idi. Bununla belə, altı aydan çox vaxt keçməsinə baxmayaraq, Rusiya və ABŞ bəzən gərgin anlar yaşayırlar".
Bu sözləri Oxu.Az-a açıqlamasında Qafqaz Strateji Araşdırmalar Mərkəzinin (KAFKASSAM) sədri, türkiyəli siyasi tədqiqatçı Hasan Oktay deyib.
Siyasi ekspert vurğulayıb ki, hər iki tərəf öz gücünü hərəkətləri, davranışları ilə nümayiş etdirməyə meyillidir:
"Əvvəllər Donald Tramp Rusiyaya qarşı sanksiyalar tətbiq edəcəyini və Ukrayna məsələsində tədbir görmək üçün qarşı tərəfə 50 günlük möhlət verəcəyini demişdi, lakin sonradan bu müddəti 12 günə endirdi.
Həmin müddətdə Donald Trampın xüsusi nümayəndəsi Stiv Uitkoff Moskvaya səfər edib. Tramp Azərbaycan Prezidentini və Ermənistanın baş nazirini Vaşinqtona dəvət edib. Ağ Evdə mühüm sənədlər imzalanıb. Bununla belə, ən mühüm məsələ Ukraynadır.
Sammitdən əvvəl Donald Tramp Avropa ölkələri ilə onlayn görüş keçirib. Volodimir Zelenskinin Ukraynanın gələcəyi ilə bağlı ciddi narahatlığı var. Hər iki tərəf Alyaskada keçirilən sammitə mümkün qədər hazırlaşmağa çalışıb.
Sergey Lavrov geydiyi köynəklə subliminal mesaj verir. Eyni zamanda, Putinin döyüş təyyarələrinin kölgəsi altında qarşılanması müharibə riskinin mövcud olduğuna dair əhəmiyyətli siqnal idi.
Sammit yeri kimi Alyaskanın seçilməsi də təsadüfi deyil, bu, Trampın Putindən üstünlüyünü nümayiş etdirmək üçün atılan addım idi. Üstəlik, "B-2" bombardmançılarının havada görünməsi Trampın Putindən üstünlüyünün növbəti göstəricisi idi.
Buna baxmayaraq, Putin isti mesaj verdi, gülümsədi və Trampın hərəkətlərinə psixoloji etibarını nümayiş etdirməyə çalışdı.
Ümumiyyətlə, hər iki lider təbii olaraq gərgindi və rahatlıqlarını jestlər və üz ifadələri ilə nümayiş etdirməyə çalışırdı.
Görüşdən əvvəl paylaşılan fotolarda hər iki tərəf mükəmməl bədən dili nümayiş etdirərək bu görüşə komanda olaraq yaxşı hazırlaşdıqlarını nümayiş etdirib. Təbii ki, görüşdən sonra səsləndiriləcək bəyanatlar və digər məsələlər əldə olunan qənaətləri daha aydın göstərəcək".
Söhrab İsmayıl
