Ukraynadan daha 30 uşaq Azərbaycana gətirilib.
Oxu.Az xəbər verir ki, Sosial Xidmətlər Agentliyinin sədr müavini Zaur İbrahimovun sözlərinə görə, Azərbaycana gətirilən ukraynalı uşaqlar Bakıda təşkil edilən düşərgədə sosioloji reabilitasiya prosesinə qoşulacaqlar.
Eyni zamanda, onlar Azərbaycan mədəniyyəti ilə yaxından tanış olacaq və peşəkar konsultasiya xidmətlərindən yararlanacaqlar.
Proqram ümumilikdə 10 gün davam edəcək. Bu müddət ərzində uşaqlar ölkəmizin müxtəlif bölgələrinə də səyahət edəcəklər. Zaur İbrahimov bildirib ki, son illərdə müharibənin təsirinə məruz qalmış 230-dan artıq ukraynalı uşaq Azərbaycanda müxtəlif reabilitasiya layihələrinə cəlb olunub. Onların arasında valideynlərini itirmiş və ciddi psixoloji travmalar yaşamış uşaqlar da var.
Düşərgədə iştirakçılar üçün milli rəqs dərsləri, fərdi psixoloji konsultasiyalar, həmçinin İçərişəhər, Qız qalası, Şirvanşahlar saray kompleksi, dənizkənarı bulvar, Atəşgah məbədi və Yanardağ kimi tarixi məkanlara ekskursiyalar nəzərdə tutulub.
Bundan əlavə, növbəti günlərdə uşaqlar qrup terapiyaları, meditasiya və yoqa məşğələləri, psixo-sosial təlimlər, milli mətbəxlə tanışlıq və müxtəlif ustad dərslərinə qatılacaqlar. Onlar, həmçinin Qəbələ və Şəki şəhərlərinə səyahət edərək tarixi və mədəni abidələrimizi yaxından görmək imkanı əldə edəcəklər.
Xatırladaq ki, ötən dövrdə ümumilikdə 230-dan çox ukraynalı uşaq ölkəmizə gətirilərək sosial-psixoloji reabilitasiya xidmətləri ilə təmin edilib.
