Yaponiyada yerləşən "Fukusima-1" atom elektrik stansiyasının (AES) ətrafındakı radiasiya zonasında mutant donuzların sürətlə və nəzarətdən kənar çoxalması qeydə alınıb.
Oxu.Az xəbər verir ki, bu barədə Böyük Britaniyanın "Mirror" nəşri məlumat yayıb.
Qeyd olunur ki, 2011-ci ildə stansiyada baş verən dəhşətli qəzadan sonra kimsəsiz qalmış fermalardakı ev donuzları qaçaraq meşədəki vəhşi qabanlarla cütləşiblər. Nəticədə ortaya çıxan hibrid nəsil öz evcil əcdadlarının sürətli nəsilartırma xüsusiyyətlərini irsi olaraq mənimsəyib.
Hirosaki və Fukusima universitetlərini təmsil edən yapon tədqiqatçılar müəyyən ediblər ki, bu yeni hibridlərin reproduktiv (çoxalma) dövrü, ildə cəmi bir dəfə balalayan adi vəhşi qabanlarla müqayisədə xeyli qısadır. Bu isə onların sayının həndəsi silsilə ilə artmasına rəvac verir.
Hazırda bioloqlar tərəfindən aqressiv invaziv növ kimi qəbul edilən bu heyvanlar kənd təsərrüfatı sahələrinə ciddi ziyan vurur, ev heyvanlarına xəsarət yetirir və yerli ekosistemi alt-üst edirlər.
İnsanların Fukusima yaxınlığındakı bölgələri tamamilə tərk etməsi nəticəsində həmin kimsəsiz ərazilərdə qaban populyasiyası kəskin sürətdə böyüyüb. Mövcud böhranlı vəziyyətlə əlaqədar olaraq, Yaponiyanın rəsmi qurumları mutant donuzların yaşayış məntəqələrini tamamilə zəbt etməsindən dərin narahatlıq keçirirlər.
