Bu gün səhər saatlarında Bakının əsas prospektlərindən birində yük avtomobili yanıb.
Bu barədə Oxu.Az-a məlumat daxil olub.
Qeyd olunub ki, hadisə Moskva prospektində baş verib.
Məsələ ilə bağlı Oxu.Az-a açıqlamasında Bakı Şəhər Dövlət Yol Polisi İdarəsinin (BŞDYPİ) bölmə rəisi, polis mayoru Toğrul Nəsirli bildirib ki, hadisə bu gün saat 05:30-da Yasamal rayonu, Moskva prospektində qeydə alınıb.
"Alı Rəhim oğlu Bayramovun idarə etdiyi MAN markalı 77-FQ-457 dövlət nömrə nişanlı yük avtomobilində yanmağa başlayıb. Dərhal əraziyə Dövlət Yol Polisinin əməkdaşları cəlb olunublar və ərazidə təhlükəsizlik təmin olunub. Faktla bağlı araşdırma aparılır", - deyə T. Nəsirli bildirib.
Oxu.Az-ın sorğusuna cavab olaraq Fövqəladə Hallar Nazirliyinin (FHN) Mətbuat Xidmətindən bildirilib ki, nazirliyin "112" qaynar telefon xəttinə paytaxtın Yasamal rayonu, Moskva prospektində avtomobildə yanğın baş verməsi barədə məlumat daxil olub.
"Məlumatla əlaqədar dərhal əraziyə FHN-in Dövlət Yanğından Mühafizə Xidmətinin qüvvələri cəlb olunublar.
Yanğınsöndürənlərin çevik müdaxiləsi sayəsində MAN markalı yük avtomobilində baş verən yanğın qısa müddətdə söndürülüb. Yanğın nəticəsində yük avtomobilinin kabin hissəsi və qoşqunun iki ədəd ön təkəri yanıb.
Avtomobilin qalan hissəsi yanğından mühafizə olunub", - deyə məlumatda bildirilib.
Əzizə İsmayılova
