İngiltərənin “Arsenal” klubu daha bir transfer həyata keçirib.
Oxu.Az xəbər verir ki, “topçular” Kot-d'İvuar yığmasının Fransa doğumlu futbolçusu Nikola Pepe ilə münasibətlərini rəsmiləşdirib.
24 yaşlı sağ cinah hücumçusu Fransanın “Lil” klubundan transfer edilib. “Arsenal”ın rəsmi saytı razılaşmanın əldə olunduğunu hələ bəyan etməsə də, Britaniya mətbuatı Pepenin London klubunun formasında müsahibə verərkən görüntüsünü yayıb.
Leaked video of Nicolas Pepe tapping the Arsenal badge during his media photos after signing for the club today. #afc pic.twitter.com/eNxZKGlG8E
— afcstuff (@afcstuff) July 30, 2019
Qeyd edək ki, ötən mövsüm 41 oyuna 23 qol vurmuş N.Pepenin iyulun 26-da İtaliyanın “Napoli” klubuna keçəcəyi deyilmişdi. Həmin vaxt Neapol klubu transfer üçün 71,7 milyon funt xərcləməyə hazır idi. Lakin bir gün sonra “Lil” bu transferi 72 milyon funta (80 milyon avro) “Arsenal”la razılaşdırdığını açıqlayıb.
Onu da bildirək ki, bu, “Arsenal” tarixinin ən bahalı transferi hesab edilir. “Arsenal”ın bunadək ən bahalı transferi qabonlu hücumçu Pyer-Emerik Obameyanq idi. O, ötən ilin yanvarında Dortmund “Borusiya”sından 56 milyon funta (62 milyon avro) transfer edilmişdi.
Səbuhi Musayev
