Almaniyanın "Bavariya" klubu Paris polisinin çıxardığı qərardan UEFA-ya şikayət edib.
Oxu.Az xəbər verir ki, bu barədə Münhen klubunun rəsmi saytı məlumat yayıb.
Məlumata görə, Fransa paytaxtında vacib oyundan öncə azarkeşlərin stadiona gəlişi ilə bağlı sərt addımlar atılıb. Azarkeşlərin arenaya gediş-gəlişini tənzimləmək üçün polis postu yaradılıb.
Bütün azarkeş avtobusları matçdan əvvəl şəhərdən kənarda dayanacaq, tərəfdarlar arenaya ictimai nəqliyyatla yollanacaqlar.
Həmçinin qonaq komanda olan "Bavariya"nın azarkeşlərinin də stadiona yalnız ictimai nəqliyyatla getməsinə icazə var. Matçdan sonra da bütün azarkeşlər stadionu eyni qaydada tərk edəcəklər. Daha sonra avtobuslar polis nəzarəti altında şəhərdən kənara çıxarılacaq.
"Bavariya" yerli polisin qərarını əsassız və gecikmiş hesab edir. PSJ-nin bu məsələdə "Bavariya"nı dəstəklədiyi qeyd edilir.
Xatırladaq ki, UEFA Çempionlar Liqasının (ÇL) Liqa mərhələsinin 4-cü turunun PSJ - "Bavariya" oyunu bu gün Parisin məşhur "Park de Prens" stadionunda keçiriləcək.
