Bakıda keçirilən Azərbaycan Qran-prisində "Formula-1" çempionatının sürücüləri sıralanma turunu başa vurublar.
Oxu.Az xəbər verir ki, sıralanma turunun nəticələrinə görə, "Ferrari" komandasının pilotu Şarl Lekler sabah baş tutacaq əsas yarışa ilk yerdən start almaq hüquq qazanıb. İkinci nəticə göstərmiş "McLaren"nin sürücüsü Oskar Pisatri də ilk cərgədən start alacaq. Sıralanma turunda ilk üçlüyü isə Şarl Leklerin komanda yoldaşı Karlos Saynz tamamlayıb.
Daha çox foto burada: PhotoStock.az
Bakıda keçirilən "Formula-1" üzrə Azərbaycan Qran-prisinin sıralama turunda "Red Bull" pilotu Maks Ferstappen liderliyi ələ keçirib.
Oxu.Az xəbər verir ki, bu, ikinci turdan sonra baş verib.
11-15-ci sıralardakı daha beş sürücü mübarizəni dayandırıb.
Bunlar Oliver Berman ("Haas"), Yuki Tsunoda (RB), Pyer Qasli ("Alpin"), Niko Hulkenberq ("Haas") və Lans Strolldur ("Aston Martin")
Bakıda keçirilən "Formula 1" üzrə Azərbaycan Qran-prisinin sıralama turunda "Ferrari" pilotu Şarl Lekler hazırda liderdir.
Oxu.Az xəbər verir ki, birinci turdan sonra beş pilot mübarizəni dayandırmalı olub.
16-cı sıradakı Daniel Rikkardo (RB), 17-ci Lando Norris ( "McLaren"), 18-ci pillədəki Valtteri Bottas, 19-cu Çjou Quanyu (hər ikisi "Kick Sauber") və sonuncu yerdəki Esteban Okon ("Alpin") ikinci sessiyaya qatılmayacaq.
Bakıda keçirilən Azərbaycan Qran-prisində "Formula-1" çempionatının sürücüləri sıralanma turuna başlayıblar.
Oxu.Az xəbər verir ki, sıralanma turu 16:00-da başlayıb. Reqlamentə görə, ən sürətli pilot bazar günü baş tutacaq əsas yarışa ilk yerdən başlayacaq.
Bakıda keçirilən "Formula 2" üzrə Azərbaycan Qran-prisində sprint yarışının qalibi mükafatlandırılıb.
Oxu.Az xəbər verir ki, birinci yeri tutan "AIX Racing" komandasından Coşua Dürksenə kuboku Gənclər və İdman Nazirliyinin şöbə müdiri Elnur Məmmədov təqdim edib.
"Dams Lucas Oil"dən Jak Kravford ikinci, "Preme Racing"dən Qabriele Mini üçüncü yeri tutub.
"Formula-2" Azərbaycan Qran-prisində sürücüləri sprint (qısa) yarışını başa vurublar.
Oxu.Az xəbər verir ki, sprint yarışının nəticələrinə görə, "AIX Racing" komandasından Coşua Dürksen birinci, "Dams Lucas Oil"dən Jak Kravford ikinci olub. İlk üçlüyü isə "Preme Racing" komandasından Qabriele Mini tamamlayıb.
Reqlamentə görə, bu gün baş tutan sprint (qısa) yarışda dünən keçirilən sıralanma turunda ilk 10 yeri tutan sürücülər reversiv start alıblar. Yəni sıralama turunda 10-cu yeri tutan "Trident" komandasının pilotu Kristian Mensel sprint (qısa) yarışa birinci yerdən başlayıb.
Xatırladaq ki, saat 16:00-da "Formula-1" üzrə sıralama turuna start veriləcək.
Daha çox foto burada: PhotoStock.az
Bakıda keçirilən Azərbaycan Qran-prisində "Formula-2" çempionatının sürücüləri sprint yarışına başlayıblar.
Oxu.Az xəbər verir ki, sprint (qısa) yarışı saat 14:15-də başlayıb.
"Formula-2" sprint (qısa) yarışı başa çatdıqdan sonra "Formula-1"də turuna saat 16:00-da start veriləcək və sürücülər ikinci günün proqramı başa vuracaqlar.
Qeyd edək ki, Azərbaycan Qran-prisi sentyabrın 15-də başa çatacaq.
"Formula-1" üzrə Azərbaycan Qran-prisində sərbəst yürüşlər başa çatıb.
Oxu.Az xəbər verir ki, günün ilk sessiyasında - üçüncü sərbəst yürüşlərdə "Mercedes" pilotu Corc Rassel birinci olub. Britaniyalı sürücü "Ferrari"dən Şarl Lekleri cəmi 0.013 saniyə qabaqlaya bilib. İlk üçlüyü tamamlayan "McLaren"in sürücüsü Lando Norris isə liderə 0.223 saniyə uduzub.
Qeyd edək ki, bu gün Azərbaycan Qran-prisində saat 14:15-də "Formula-2" sürücüləri sprint (qısa) yarışda qalibi müəyyən edəcəklər.
Günün son sessiyasında isə sıralanma turunda "Formula-1" sürücüləri saat 16:00-da poul uğrunda mübarizəyə başlayacaqlar.
Azərbaycan Qran-prisi isə sentyabrın 15-də başa çatacaq.
Daha çox şəkil burada: PhotoStock.az
"Formula-1" üzrə Azərbaycan Qran-prisində üçüncü sərbəst yürüşlər ikinci dəfə dayandırılıb.
Oxu.Az xəbər verir ki, bu dəfə "Haas" komandasının debütant pilotu Oliver Berman birinci döngədə baryerlərə çırpıldığından yürüşlər dayandırılıb.
Sürücü uzun düzlükdə böyük sürət yığıb və birinci döngəyədək sürəti azalda bilməyib, döngəyə girdikdən sonra sükanı əks istiqamətə döndərməklə təhlükəsizlik cibinə girməyə çalışıb, amma ön sol təkərlə baryerlərə çırpılıb.
Maşın operativ təxliyə olunub və 4 dəqiqədən sonra sessiya davam edib.
Qeyd edək ki, daha öncə "Alpin" komandasının fransalı pilotu Estaban Okonun bolidində yaranan texniki nasazlıq üzündən sessiya dayandırılmışdı.
"Formula-1" üzrə Azərbaycan Qran-prisinin üçüncü sərbəst yürüşünün 14-cü dəqiqəsində "Alpin" komandasının fransalı pilotu Estaban Okon bolidindəki texniki nasazlığa görə Neftçilər prospektində dayanmalı olub..
Oxu.Az xəbər verir ki, pilotun dayandığı yer təhlükəli, onun təxliyəsi isə uzunmüddətli olduğu üçün marşallar qırmızı bayraqları dalğalandırmağa başlayıblar və sessiya dayandırılıb.
Qeyd edək ki, Esteban Okon 16-cı döngədə mühərrikin gücünün itdiyi barədə komandasına məlumat verib.
10 dəqiqəlik fasilədən sonra qırmızı bayraqlar yaşıl bayraqlarla əvəz olunub və sessiya davam edib.
Bakıda təşkil olunan "Formula-1" üzrə Azərbaycan Qran-prisində ikinci günün sessiyalarına start verilib.
Oxu.Az-ın məlumatına görə, pilotlar üçüncü sərbəst yürüşlər üçün saat 12:30-da boksları tərk ediblər.
"Formula-1" sürücülərinin məşqlərinin ardınca "Formula-2"də sprint (qısa) yarışı keçiriləcək.
Xatırladaq ki, günün sonunda isə dünyanın ən sürətli sürücüləri sıralanma turunda güclərini sınayacaqlar.
Qeyd edək ki, Bakıda keçirilən "Formula-1" üzrə Azərbaycan Qran-prisi sentyabrın 15-də başa çatacaq.
Bakıda təşkil olunan "Formula-1" üzrə Azərbaycan Qran-prisində ikinci günə start veriləcək.
Oxu.Az-ın məlumatına görə, ilk olaraq pilotlar üçüncü sərbəst yürüşdə iştirak edəcəklər.
Ardınca "Formula-2"də sprint yarışı keçiriləcək.
Günün sonunda isə birinci dərəcəli sürücülər sıralanma turuna qatılacaqlar.
Azərbaycan Qran-prisi: İkinci günün proqramı
14 sentyabr
12:30. "Formula-1": Üçüncü sərbəst yürüş
14:15. "Formula-2": Sprint yarışı
16:00. "Formula-1": Sıralanma turu
Qeyd edək ki, Bakıdakı yarış sentyabrın 15-də başa çatacaq.
