"Napoli" klubunun məşqçilər korpusunda ciddi dəyişikliklərin baş verəcəyi gözlənilir.
Oxu.Az İtaliya mediasına istinadən xəbər verir ki, Neapol təmsilçisi və komandanın hazırkı baş məşqçisi Antonio Konte müqaviləyə qarşılıqlı razılıqla xitam verməyə hazırlaşırlar.
Bu ayrılıqdan sonra boş qalacaq posta ən real namizəd kimi isə Mauritsio Sarrinin adı hallanır. Tərəflər arasında artıq ilkin təmaslar qurulub və klub rəhbərliyi təcrübəli mütəxəssisin Neapola ehtimal olunan qayıdışına olduqca müsbət yanaşır.
Əgər Antonio Konte klubdan ayrılarsa, onun karyerasını yığma səviyyəsində davam etdirərək İtaliya millisinin "sükanı arxasına" keçmək ehtimalı da gündəmdədir.
Xatırladaq ki, İtaliya A Seriyasında mövsümün başa çatmasına cəmi bir tur qalmış "Napoli" turnir cədvəlinin ikinci pilləsində qərarlaşıb və bununla da növbəti mövsüm üçün Çempionlar Liqasında iştirak hüququnu rəsmən təmin edib.
