Braziliya millisinin sabiq futbolçusu Roberto Karlos doğma vətəninin azarkeşlərini məyus edəcək açıqlama verib. "Real Madrid"in keçmiş müdafiəçisi hazırda Argentina yığmasının Braziliyadan daha güclü olduğunu etiraf edib.
Oxu.Az xəbər verir ki, Roberto Karlos bu fikirləri Serxio Agueronun təqdim etdiyi "Casa del Kun" proqramında səsləndirib.
"Gəlin keçmişi bir kənara qoyaq. Bu günə baxsaq, siz son dünya çempionusunuz. Braziliya hazırkı dünya çempionu olan Argentinanı məğlub etmək üçün oyununu daha da yaxşılaşdırmalıdır.
Düşünürəm ki, Argentina öndədir. Əvvəla, ona görə ki, komanda ilə uzun müddətdir çalışan baş məşqçiləri var. Bundan başqa, onların bütün futbol dünyası və bizim nəslimiz üçün etalon sayılan Leo Messisi var", - deyə Roberto Karlos bildirib.
Bununla yanaşı, sabiq futbolçu qeyd edib ki, Braziliya millisi oyununu inkişaf etdirməyə davam edərsə, 2026-cı il dünya çempionatının finalına qədər irəliləmək potensialına malikdir.
