Məşhur futbol ulduzu Kriştianu Ronaldu karyerasında ilk dəfə millinin heyətində meydandan qovulub.
Oxu.Az xəbər verir ki, 40 yaşlı futbolçu DÇ-2026-nın seçmə mərhələsinin İrlandiya ilə səfər oyununda birbaşa qırmızı vərəqə alıb.
Ronaldunun meydandan qovulduğu 59-cu dəqiqədə hesab 2:0 meydan sahiblərinin xeyrinə olub. Sonrakı dəqiqələrdə hesab dəyişməyib və İrlandiya yığması güclü rəqibini məğlub edib.
Oyundan sonra Portuqaliya millisinin baş məşqçisi Roberto Martines Ronaldunun meydandan qovulmasının ədalətli qərar olmadığını dilə gətirib: "Kriştianu tez-tez cərimə meydançasına daxil olur və müdafiəçilərlə toqquşur. Onun bəzən təmasdan tamamilə yayınması çətin olur. Həmin epizodda da futbolçumuzun qəsdən kobud oynamadığını düşünürəm".
Xatırladaq ki, hazırda Portuqaliya 10 xalla F qrupunda liderliyini qoruyur. Sonrakı yerləri Macarıstan (8), İrlandiya (7) və Ermənistan (3) tuturlar. Son turun oyununda Portuqaliya seçməsi öz meydanında Ermənistanla qarşılaşacaq.
