Şahdağda xizək alpinizmi üzrə Dünya Kubokunun açılış mərasimi baş tutub.
Oxu.Az xəbər verir ki, yarış Gənclər və İdman Nazirliyinin dəstəyi, Beynəlxalq Xizək Alpinizmi Federasiyasının, Azərbaycan Qış İdman Növləri Federasiyasının və "Şahdağ" Turizm Mərkəzinin təşkilatçılığı ilə 10-13 yanvar tarixlərində keçiriləcək.
Yarışda 26 ölkədən - Azərbaycan, Türkiyə, Belçika, Bolqarıstan, Kanada, Çin, Avstriya, Andorra, İspaniya, Çexiya, Fransa, Almaniya, İran, Qazaxıstan, Niderland, Norveç, Polşa, Qətər, Slovakiya, Amerika Birləşmiş Ştatları, Böyük Britaniya, Yunanıstan, Sloveniya və fərdi neytral idmançılar olmaqla 130-a yaxın idmançı iştirak edəcək. Atletlər yanvarın 10-da sprint, 11-də vertikal və 13-də fərdi növlər üzrə mübarizə aparacaqlar.
Yarışda Azərbaycanı idmançılarımız Nəzrin Qəribova və Seyid Sədrəddinov təmsil edəcəklər.
Qeyd edək ki, Dünya Kuboku 2026-cı ildə keçiriləcək Qış Olimpiya Oyunlarına lisenziya qazanmaq üçün təsnifat yarışlarından biri hesab edilir.
