1 fevral 2026-cı il. Sidney. Qudos Bank Arena.
UFC 325 təkcə 2026-cı ilin ikinci böyük nömrəli turniri deyil. Bu gecə həm də yarımçıq qalan sualların, səssiz narazılıqların və açıq şəkildə mübahisə doğuran titul qərarlarının mərkəzinə çevrilir. Kart güclüdür, amma bütün diqqət əsas döyüşə yönəlir.
Volkanovski - Lopes 2: rəsmi revanş, qeyri-rəsmi mübahisə
Əsas döyüşdə yarımçıq qalmış hekayə yenidən başlayır. Aleksandr Volkanovski və Dieqo Lopes ikinci dəfə üz-üzə gəlirlər. Onların ilk qarşılaşması 2025-ci il 12 aprel tarixində Mayami şəhərində baş tutmuşdu. Beş raundlu, balanslı və yüksək tempdə keçən döyüşdə hakimlərin qərarı ilə qalib gələn Volkanovski kəmərini geri alaraq 66 kq çəki dərəcəsində mübahisəsiz çempion statusunu yenidən təsdiqləmişdi.
O döyüşdə Lopes məğlub olsa da, zəif görünmədi. Əksinə, təzyiqi, aqressiyası və döyüşün ritmini tez-tez dəyişməsi Volkanovskini maksimum diqqətdə saxlamışdı. Məhz bu amil revanş üçün əsas arqument kimi göstərilir. Lakin problem də buradan başlayır.
Bəs Movsar Evloev niyə deyil?
Hazırda yarımyüngül çəki dərəcəsinin rəsmi 1-ci nömrəli iddiaçısı Movsar Evloevdir. Rekordu - 19-0. Məğlubiyyətsiz, stabil, səhvsiz, amma səssiz. UFC-nin qərarı isə onu növbədən kənarda saxladı.
Göstərilən əsas arqument Evloevin təxminən birillik fasiləsi və döyüş stilinin "riskli marketinq materialı" kimi qiymətləndirilməsidir. O, qalib gəlir, lakin partlayış yaratmır. Bu isə UFC üçün həmişə əsas meyar olmasa da, tez-tez həlledici faktora çevrilir.
Leron Mörfi faktoru - səssiz, amma təhlükəli alternativ
Mövzu təkcə Evloevlə bitmir. Divizionda başqa bir məğlubedilməz ad da var - Leron Mörfi (17-0-1 MMA, 9-0-1 UFC). Avqust ayında o, keçmiş Bellator ulduzu Aaron Pikonu dönmə dirsək zərbəsi ilə vaxtından əvvəl məğlub etdi və ardıcıl qələbə seriyası ilə diqqət mərkəzinə düşdü.
MMA ictimaiyyəti və analitiklər arasında belə fikir formalaşıb:
Mörfi aktivliyi, son qələbələrin keyfiyyəti və yüksələn trayektoriyası baxımından titul döyüşünə daha "isti" namizəddir - nəinki bir il döyüşməyən Evloev və ya seriyası indi formalaşmağa başlayan Lopes.
Bəs niyə yenə Lopes?
Cavab sadədir, lakin birmənalı deyil:
- stil uyğunluğu;
- azarkeş reaksiyası;
- ilk döyüşün "yenidən baxmağa dəyər" olması;
- Latın bazarı və Avstraliya arenasında yaradılan dramatik fon.
Lopes Volkanovski üçün rahat rəqib deyil. O, çempionu döyüşməyə məcbur edir, risk alır. Uduzsa belə, prosesin içində olur. UFC-nin revanş qərarı məhz bu "canlılıq" üzərində qurulub.
İkinci döyüşdən sonra Volkanovskinin karyerasını bitirəcəyi ilə bağlı şayiələr dolaşsa da, çempion bunu açıq şəkildə təkzib edib. Əksinə, bildirib ki, əgər Dieqo üzərində yenidən qalib gəlsə, növbəti titul müdafiələrini gənc və məğlubedilməz rəqiblərə qarşı keçirmək istəyir.
Adlar artıq açıq səsləndirilib:
Movsar Evloev
Leron Mörfi
Bu isə o deməkdir ki, UFC 325 yalnız revanş deyil - gələcək titul xəritəsinin başlanğıc nöqtəsidir.
Nəticə
Volkanovski - Lopes 2 rəsmi olaraq revanşdır.
Lakin qeyri-rəsmi olaraq bu döyüş "niyə məhz o?" sualına cavab verməlidir. Əgər Volkanovski yenidən qalib gəlsə, bəhanələr bitəcək və növbədə yalnız gənclər dayanacaq. Amma əgər Dieqo Lopes bu dəfə qalib gəlsə, UFC-nin bu qərarı tarix qarşısında əsaslandırılmış olacaq.
Sidneydə yalnız kəmər deyil, ədalət anlayışı da sınağa çəkiləcək.
Bünyad Qaraxanlı
