“Tottenhem” yeddi qolla qələbə qazandı - VİDEO

Dünən İngiltərə kubokunda III mərhələnin oyunlarına start verilib.

Oxu.Az xəbər verir ki, Premyer Liqa klublarının da mübarizəyə qoşulduğu bu mərhələdə dünən bir oyun keçirilib.

Belə ki, “Tottenhem” Mersisaydda Liqa 2 (III divizion) təmsilçisi “Tranmir Rovers”in qonağı olub. Görüş gözlənildiyi kimi darmadağınla başa çatıb. London təmsilçisi rəqibinə yeddi cavabsız top vurub. Baxmayaraq ki, ilk hissə 1:0 hesabı ilə başa çatıb.

“Tottenhem”dən qolları Fil Dişi Sahilindən olan müdafiəçi Serj Orye (2), ispaniyalı Fernando Lyorente (3), cənubi koreyalı Hın-Min Son və Hari Keyn vurub.

Qeyd edək ki, Premyer Liqanın nəhənglərindən bu gün “Mançester Yunayted” “Redinq”lə, “Çelsi” “Notinqem Forest”lə, “Bləkpul” “Arsenal”la qarşılaşacaq. Sabah “Mançester Siti” “Roterhem Yunayted”, yanvarın 7-də isə “Liverpul” “Vulverhempton”la görüşəcək.

Səbuhi MUSAYEV