"Windows 11"də YENİ FUNKSİYALAR

"Microsoft" "Windows 11"in yeni beta versiyasında süni intellekt funksiyalarını "Bələdçi" (File Explorer) fayl menecerinə inteqrasiya edib.

Oxu.Az xəbər verir ki, bu barədə "The Verge" məlumat verib.

Yenilik intellektual alətlərə sürətli çıxışı təmin edir: siçanın sağ düyməsini klikləməklə istifadəçilər "Şəkillər" (Photos) tətbiqində şəkillərin fonunu tutqunlaşdıra, "Paint"də fotoşəkillərdən obyektləri silə, "Office"də sənəd məzmununun avtomatik xülasəsini əldə edə və "Bing" vizual axtarışından istifadə edə bilərlər.

"Microsoft" tezliklə süni intellekt əməliyyatlarını ofis fayl formatları ilə sınaqdan keçirməyə başlayacaq. Əsas xüsusiyyətlərə "OneDrive" və "SharePoint"də sənədlərdən xülasələrin avtomatik yaradılması, həmçinin məlumatlar əsasında siyahıların yaradılması daxildir. Bu imkanlar əvvəlcə "Copilot" lisenziyası olan "Microsoft 365" korporativ istifadəçiləri üçün əlçatan olacaq, lakin sonradan digər istifadəçilər üçün genişləndiriləcək.

Şirkət, həmçinin fərdiləşdirilmiş və interaktiv lentlə "Windows 11"də vidcetlərin yenilənməsi üzərində işləyir. Yeniliklərin siyahısında istifadəçilərə tematik məzmun seçimləri təqdim edəcək kurasiya edilmiş "Copilot" hekayələri var.

Bundan əlavə, "Microsoft" notbuk və planşetlərin enerji istehlakını azaldacaq "CPU Power Management" sistemini sınaqdan keçirir.