Qazaxıstan və Çin Xəzərdə yatağın kəşfiyyatında səylərini birləşdirir

Qazaxıstanın "KazMunayQaz" və Çinin CNOOC korporasiyası Xəzər dənizinin şimal-şərq hissəsinin tranzit zonasında "Jılıoy" layihəsinin həyata keçirilməsi şərtləri haqqında sazişlər imzalayıblar.

Oxu.Az bu barədə Qazaxıstanın aparıcı neft-qaz şirkətinə istinadla xəbər verir.

Bildirilir ki, şirkətlər bir-birini strateji tərəfdaş kimi tanıyıb və yeni perspektivli layihənin 50/50 paritet əsasında birgə kəşfiyyatı və işlənməsi barədə razılığa gəliblər.

İmzalanmış sənədlərə əsasən, kəşfiyyat işlərinin maliyyələşdirilməsini Çin tərəfi öz üzərinə götürür. Planlaşdırılan geoloji kəşfiyyat işlərinin minimum iş proqramına aşağıdakılar daxildir:

- 3D seysmik kəşfiyyat (çöl işləri, 400 kv.km-lik məlumatların emalı və şərhi);

- 2D tarixi məlumatların yenidən işlənməsi (400 xətti km);

- 2000 m dərinliyində bir duz üstü kəşfiyyat quyusunun qazılması (müstəqil mərhələ);

- 3D seysmik kəşfiyyatdan əldə edilən nəticələrdən asılı olaraq, 4500 m dərinliyində bir duz altı kəşfiyyat quyusunun qazılması (asılı mərhələ).