Xocavənddə bir evin təmirinə 66 min manat sərf olunacaq

Xocavənd şəhərində 50 fərdi yaşayış evi və Xocavənd rayonunun Kiş kəndində isə 40 fərdi yaşayış evinin əsaslı təmir işləri aparılacaq.

Oxu.Az xəbər verir ki, Ağdam, Füzuli və Xocavənd rayonlarında Bərpa, Tikinti və İdarəetmə Xidməti bununla bağlı bir mənbədən satınalma həyata keçirərək işlərin icrasını iki şirkətə tapşırıb.

Xocavənd şəhərində 50 ev (8 415 m²) fərdi yaşayış evinin əsaslı təmiri üçün "Proqress 555" MMC ilə 2 milyon 936 min manat, Kiş kəndində 7 600 m² ümumi sahəyə malik 40 evin təmiri üçün isə "Fasttech" MMC ilə 2 milyon 656 min manat məbləğində müqavilə bağlanılıb.

Şərtlərə görə, evlərin təmiri aprelin əvvəlinə başa çatmalıdır.

Qeyd edək ki, bir evin təmiri Xocavənd şəhərində təqribən 60 min, Kiş kəndində isə 66.4 min manata başa gələcək.