"Yeni Dövlət Proqramının qarşısına qoyduğu əsas hədəf kənd təsərrüfatında illik ümumi daxili məhsul artımının ən azı 2 faiz və onun üzərində olmasına nail olmaqdır".
Oxu.Az xəbər verir ki, bunu kənd təsərrüfatı nazirinin müavini Zaur Əliyev Kənd Təsərrüfatı Nazirliyində keçirilən mətbuat konfransında deyib.
"Həmçinin illik aqrar və qida məhsulları ixracının da 6 faizdən yuxarı həcmdə artımına nail olmaq əsas hədəflərdəndir. Mövcud 1.5 milyard dollarlıq ixracın 2030-cu ilə qədər iki milyard dollar üzərində rəqəmə nail olunacağını hədəfləyirik. İxrac artımı isə təkcə həcm və dəyər ifadəsində olmayacaq, həmçinin ixrac coğrafiyasının şaxələndirilməsi istiqamətində də dəstəkləyici tədbirlər həyata keçiriləcək", - nazir müavini əlavə edib.
