Xalq artisti Ağayev Faiq Balağa oğlu 29 dekabr 1971-ci ildə Bakıda anadan olub.
Oxu.Az xəbər verir ki, müğənni 1988-ci ildə “Bakı Payızı-88” respublika müsabiqəsinin qalibi olub. Elə həmin ildən peşəkar səhnəyə gəlib.
Bu müsabiqədən sonra “Qızıl Payız-89” respublika müsabiqəsində, Beynəlxalq “Vitebsk-90” müsabiqəsində, Beynəlxalq “Yalta-92” televiziya müsabiqəsində də qalib gələrək, peşəkar ifaçı kimi ad qazanmağa nail olub.
1993-cü ildə Azərbaycan Dövlət Mədəniyyət və İncəsənət Universitetinin musiqili teatr aktyoru fakültəsini fərqlənmə diplomu ilə bitirib. Universiteti bitirdikdən sonra Klavdiya Şuljenko adına “Xarkov-95” Beynəlxalq Retro mahnılar müsabiqəsində və “Qızıl Şlyager” – Mogilyov – 96 Beynəlxalq müsabiqəsində də qalib gəlib.
1995-ci ildə müğənninin “Ola bilməz” adlı ilk albomu çıxır. Ardınca “Səni əvəz eləmir”, 1998-ci ildə “Vəfasızım”, 1999-cü ildə “Faiq Ağayev – Seçmələr”, 2000-ci ildə “Minilliyin sonu...” və 2002-ci ildə “Tam məxfi” adlı albomları işıq üzü görür.
1998-ci ildə Faiq Ağayev “İlin konserti” nominasiyasında, 1999-cu ildə isə “Dəşti” klipinə görə “İlin klipi” nominasiyasında “Humay” Milli Mükafatının sahibi olur. Həmçinin 1999-cu ildə o, “İlin müğənnisi” nominasiyasında “Grand” Milli Mükafatını qazanır.
2000-ci il oktyabrın 28-də Azərbaycan Respublikasının Prezidenti Heydər Əliyevin Fərmanı ilə Faiq Ağayevə Azərbaycan Respublikasının Əməkdar Artisti fəxri adı verilir.
2000-ci ildə “İlin müğənnisi” nominasiyasında “Qızıl Mikrofon” Milli Mükafatını qazanan Faiq Ağayev, 2001-ci ildə “İlin müğənnisi”, “İlin albomu” (“Minilliyin sonu...”) və “İlin konserti” (“Əsrin və minilliyin son konserti”) nominasiyalarında “Grand” Milli Mükafatına sahib olur.
Pərəstişkarlar arasında “Cənab Qızıl Şlyager” adını qazanan Faiq Ağayev yaradıcılıq fəaliyyəti ərzində 120-dən çox solo konsert verib (2007-ci ilə qədər).
2007-ci il 7-12 yanvar tarixlərində Heydər Əliyev Sarayında 5 günlük solo-konsert keçirməklə Faiq Ağayev Azərbaycan musiqi tarixində rekord müddət müəyyən etmiş olur.
2008-ci ilin 17 sentyabr tarixində Faiq Ağayevə Azərbaycan Respublikasının Prezidenti İlham Əliyevin Sərəncamı ilə Azərbaycan Respublikasının Xalq Artisti fəxri adı verilir.
Bundan sonrakı bir neçə ildə Faiq Ağayev “Bal kimi”, “Hiss et”, “Odlanacaqsan”, “Billahi”, “Əlvida” və s. hit olan mahnılarını ifa edir.
2012-ci ilin 27-30 dekabr tarixlərində Faiq Ağayevin Heydər Əliyev Sarayında 4 günlük anşlaqlı “Vida” solo konsertləri keçirilib.
O, 1996-cı ildən Azərbaycan Dövlət Teleradio Verilişləri Şirkətinin solistidir.
Aytən Sadıqzadə
www.oxu.az
