Qazaxıstanın azərbaycanəsilli musiqiçisi Jah Khalib (Bəxtiyar Məmmədov) yaxın günlərdə ölkəsində keçirilməsi planlaşdırılan konsertlərini təxirə saldığını elan edib.
Oxu.Az xəbər verir ki, sənətçi bu barədə "Instagram" hesabında paylaşım edib.
O bildirib ki, qızının səhhətindəki ciddi problemlər səbəbindən səhnəyə çıxmaq gücündə deyil.
"Əfsuslar olsun ki, bu turu ləğv etməli və ya (əgər gözləməyə hazırsınızsa) təxirə salmalı olacağam. Səbəb isə yenidoğulan qızımın əməliyyatdan sonra kritik vəziyyətdə olmasıdır. Gücümü toplamağa çalışsam da, səhnəyə çıxmağa hazır deyiləm", - deyə Jah Khalib bildirib.
Müğənni qeyd edib ki, bu çətin dönəmdə həyat yoldaşının yanında olmalıdır və pərəstişkarlarından anlayış göstərmələrini xahiş edib:
"Ümid edirəm ki, anlayışla qarşılayarsınız. Xahiş edirəm, kim necə bacarırsa, dua etsin ki, övladlarımız sağ-salamat olsunlar".
