"1993-cü ildə Ağdamdan çıxmışam, 74 yaşımda öz evimə, doğma torpağıma qayıdıram. Hətta danışa da bilmirəm, bala".
Oxu.Az xəbər verir ki, bu sözləri Ağdam şəhərinə qayıdan keçmiş məcburi köçkün, Birinci Qarabağ müharibəsi veteranı Vidadi Həsənov deyib.
O bildirib ki, ömrünün son illərini doğma torpağında keçirmək istəyir:
"Qismət belə gətirdi, Bakıya gəldik, indi də qismət belə gətirdi ki, öz evimizə, doğma torpağımıza qayıdırıq. Hər yer bizim torpağımızdır, amma Ağdam bizim üçün doğmadır.
Mənim 74 yaşım var. İstədim ki, axır günlərimi doğma torpağımda keçirəm. Çox sağ olsun bizim Baş Komandanımız. Bizə bu şad günləri göstərdi, verdi. Minnətdaram, çox minnətdaram.
Həyat yoldaşım və böyük qızımla qayıdıram. Ağdamda istəyirəm ki, cavanlara bir az böyüklük edək, yol göstərək. Qoy cavanlar da buranı qorusunlar, heç kimə verməsinlər.
44 günlük müharibədə vuruşan bütün o uşaqların qarşısında baş əyirəm. Onlar canları bahasına bizi bu gün evimizə, torpağımıza qaytardılar. Çox sağ olsunlar".
