Paşinyanın növbəti hoqqabazlığı: Erməni baş nazir sülh danışıqlarını niyə yubadır?

"Paşinyan sülh müqaviləsinin imzalanması ilə bağlı verdiyi açıqlamalarla həm ölkəsinin daxili auditoriyasını, həm də beynəlxalq ictimaiyyəti aldadır. O, özünü sanki sülh carçısı kimi təqdim edir, amma sülhün əldə olunması üçün hərəkət etmir və əksinə, ölkəsini sürətlə silahlandırır".

Bunu Oxu.Az-a açıqlamasında Milli Məclisin deputatı Azər Badamov deyib.

Onun sözlərinə görə, Azərbaycanla Ermənistan arasında aparılan sülh danışıqları ilə bağlı müzakirə olunaraq razılaşdırılan 15 maddə və bu gün Paşinyanın mövzudan yayındırmaq istədiyi iki maddə hamıya aydındır:

"Düzdür, digər məsələlərin də icrası vacibdir. Məsələn, Avropa İttifaqının (Aİ) kəşfiyyatçılarının sərhəd ərazilərdən çıxarılması, Zəngəzur dəhlizinin açılması kimi məsələlərin həll olunması vacibdir. Amma sülh müqaviləsi ilə bağlı danışıqların predmeti olan iki məsələ mütləq şəkildə həll olunmalıdır. Bu iki məsələ - Ermənistan konstitusiyasında Azərbaycana qarşı olan ərazi iddialarının rəsmi şəkildə ortadan qaldırılması və Minsk qrupun ləğvi ilə bağlı ATƏT-ə müraciətin ünvanlanması mütləq şəkildə öz həllini tapmalıdır ki, ilkin sənəd imzalansın. Paşinyanın açıqladığı kommunikasiyaların açılması məsələsi isə sülh müqaviləsinin imzalanmasından sonra mümkün ola bilər. Çünki iki ölkə arasında sülh olmadan hansı əlaqələrin yaradılmasından danışmaq olar? Təbii ki, Paşinyanın fikirləri absurddur və özünün əsl niyyətlərini ictimaiyyətdən gizlədilməsinə hesablanıb".

Deputat Sahib Alıyev isə Oxu.Az-a açıqlamasında bildirib ki, Paşinyanın sülh danışıqları ilə bağlı bəyanatında konstruktiv görünməyə cəhddən başqa yeni heç nə yoxdur:

"Bir il bundan öncə də bildirilib ki, 17 maddəlik sülh anlaşmasının 15 maddəsi ilə bağlı tərəflər tam razılığa gəliblər. Paşinyan ABŞ-dən Bayden administrasiyası dönəmindəki dəstəyi ala bilməyəcəyini gördüyündən ritorikasını yenə dəyişir".

"Bu baxımdan, ən önəmli sayılacaq açıqlama onun yeni konstitusiya və milli təhlükəsizlik strategiyasının hazırlanması haqda dedikləridir ki, burada da real niyyətdən daha çox Rusiya və İranı şantaj cəhdindən danışmaq olar. Paşinyan hər iki dövlətin Ermənistanda onun rəqibləri ilə keçirdikləri açıq və gizli görüşlərdən, həmin görüşlərdə onlara hansı təlimatların verildiyindən xəbərdardır. Ona görə də Azərbaycanla sülhün yolunu açacaq dəyişikliklərə gediləcəyinin anonsunu verməklə həmin dövlətləri rəqiblərinə hakimiyyətinin və demək ki, özünün təhlükəsizliyini təhdid edəcək səviyyədə dəstək verməkdən çəkindirməyə çalışır. Çünki İranla Rusiyanın Azərbaycanla Ermənistan arasında sülhü istəmədiklərini gözəl bilir. Bir sözlə, mən Paşinyanın yenidən göyərçinliyə başlamasına, konstruktivlik təsiri bağışlayan son "ideoloji" açıqlamalarına sülhə doğru atılmış addım yox, hakimiyyətinin qorunub saxlanmasına yönəlmiş növbəti hoqqabazlıq kimi yanaşıram", - deyə deputat əlavə edib.

Mərahim Nəsib