"Qondarma "Qarabağ hərəkatı"nın iştirakçısı və quldur dəstələrinin komandirlərindən birinin bacısı olan Svetlana Markaryan özünün "Arxadan açılan atəş" kitabında 1988-ci ilin payızında Ermənistanın Ararat vilayətinin Xalisa kəndindən azərbaycanlıların zorakılıqla qovulmasını təsvir edib. Onun şahidliyinə görə, qarətlərin və talanların təşkilatçıları arasında Ermənistanın gələcək müdafiə naziri Vazgen Sarkisyan da olub və o, azərbaycanlı ailələrin pul və qızıl-gümüşlərinin əlindən alınmasına şəxsən nəzarət edib".
Oxu.Az xəbər verir ki, bu barədə Caliber.Az-ın "YouTube" kanalının növbəti buraxılışında bəhs edilir.
"Markaryan zorakılıq səhnələrini - yaşlı insanların döyülməsini, qadınların təhqir olunmasını və qəddar rəftarı, o cümlədən deportasiya üçün yük maşınına mindirilərkən kütlə tərəfindən yerə yıxılan hamilə azərbaycanlı qadınla bağlı epizodu ətraflı təsvir edir. Bu epizodlar erməni tarixşünaslığının azərbaycanlıların guya Ermənistanı "dinc şəkildə tərk etməsi" barədə çoxillik tezisini alt-üst edir. Kitab münaqişədə erməni tərəfinin müstəsna olaraq "qurban" olması obrazını şübhə altına qoyur.
Markaryanın iddiasına görə, qovulmuş azərbaycanlılardan müsadirə edilən pul və qiymətli əşyalar Birinci Qarabağ müharibəsinin başlanğıcında silahlı birləşmələrin maliyyələşdirilməsi və silah alınması üçün istifadə olunub. Bu fonda Vazgen Sarkisyan və Ermənistanın digər gələcək liderlərinin siması "azadlıq mübarizəsinin rəmzi" kimi deyil, 1980-ci illərin sonundakı zorakılıq və ekspropriasiya sistemindən boy atmış şəxslər kimi təqdim olunur", - deyə materialda qeyd olunur.
