Bakıda mağazaların birində çörəyin üstünə çıxmış pişiyin görüntüləri sosial şəbəkələrdə müzakirələrə səbəb olub.
Oxu.Az-ın məlumatına görə, kadrlar sosial şəbəkədə yayılıb.
Görüntülərdən məlum olur ki, pişik qutularda yığılan çörəyin üstünə çıxıb, onları yeyir.
Videonu paylaşan Nigar adlı istifadəçi bildirib ki, mağaza hələ açıq olmadığına görə çörək paylayan şəxs yeşikləri obyektin qarşısına qoyub gedib.
Qida Təhlükəsizliyi Agentliyindən Oxu.Az-ın sorğusuna cavab olaraq bildirilib ki, adıçəkilən videonun nə vaxt və harada çəkildiyi barədə heç bir məlumat yoxdur:
“Lakin video agentlik tərəfindən mediadan götürülərək araşdırılması üçün müvafiq şöbələrə yönləndirilib. Artıq bununla bağlı araşdırmalara başlanılıb. Araşdırmaların nəticələrinə uyğun olaraq qanunvericiliyin tələbləri çərçivəsində tədbirlər görüləcək. Nəticələr barədə ictimaiyyətə ətraflı məlumat veriləcək.
Agentlik vətəndaşlardan xahiş edir ki, belə hallarla qarşılaşdıqda videonun çəkildiyi tarix, məkan və müəssisənin adını qeyd etməklə 1003 qaynar xəttinə zəng edib məlumat versinlər”.
İlhamə Əbülfət
