İyn
2022
09:06
22
327
5525
Virtual karabakh

Bakı metrosunda sərnişin siqaret çəkdi - VİDEO

9 İyn, 2022
09:06
5525

Bakı metrosunda sərnişin siqaret çəkdi - VİDEO

Metroda sərnişinlərdən biri siqaret çəkib. 

Oxu.Az xəbər verir ki, sözügedən məsələ ilə bağlı video sosial şəbəkələrdə paylaşılıb. 

Belə ki, metropolitendə yeni qatarlardan birində orta yaşlı bir kişi sərnişin vaqonunun ortasında siqaret yandırır. Ətrafdakı xanım sərnişinlər yerlərindən duraraq oradan uzaqlaşırlar, digər iki sərnişin isə kişiyə yaxınlaşaraq siqaret çəkməsinin qarşısını almağa çalışır. 

Metroda tütün məhsullarının istifadəsi qanunla qadağandır. Bu kimi hallar sadəcə qanun pozuntusu deyil, bütün sərnişinlər üçün həyati təhlükə yarada bilər. 

Məsələ ilə bağlı “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov Oxu.Az-a açıqlamasında bildirib ki, bu istiqamətdə araşdırma aparılır: 

“Hadisənin nə zaman, hansı stansiyada, hansı vaqonda baş verdiyi aidiyyəti şöbə tərəfindən araşdırılır. Lakin paralel olaraq sərnişinlərimizin bu kimi hallarla qarşılaşdıqları zaman maşinist rabitəsi vasitəsilə maşinistlə əlaqə saxlayıb məlumat vermələri tövsiyə olunur. Eyni zamanda qatar stansiyaya girdiyi zaman həmin qayda pozan sərnişin və ya sərnişinlərə narahatlıq yaradan hər-hansı bir durum barədə metropoliten əməkdaşlarına və metro polisinə də məlumat vermələri arzuolunandır. Bu kimi hallarda bənzər problemlər daha tez müəyyənləşir və aradan qaldırılır. Sözügedən video ilə bağlı araşdırmanın yekun nəticəsi barədə ictimaiyyətə məlumat veriləcək”. 

Metropolitendən istifadə qaydalarına görə, stansiyada siqaret çəkmək qadağandır. 

Belə ki, “Bakı Metropoliteni” QSC-də sərnişinlərin platformada və qatarda olarkən əməl etməli olduqları qaydalar sırasında bir sıra nüanslar qeyd edilib. 

Sərnişinlərin vəzifələri ilə yanaşı, metropolitendə onlara qoyulan qadağalar da var. Həmin qadağalar üzrə İnzibati Xətalar Məcəlləsinin (İXM) 140-1.4.maddəsinə əsasən, eskalatorun sürahisini çıxarmağa, zərurət olmadan “Stop” açarından istifadə etməyə, stansiyaların vestibüllərində, keçidlərində və platformalarında, vaqonlarda siqaret çəkməyə, qatarın hərəkəti zamanı vaqonun qapılarını açmağa, qatarın yola düşməsini ləngitməyə, özbaşına dəmiryoluna düşməyə, qatarın idarəetmə kabinəsinə, xidməti-texniki otaqlara, ventilyasiya şaxtası köşklərinə, tunellərə və metropolitenin işçiləri üçün nəzərdə tutulan çəpərlənmiş ərazilərə daxil olmağa, açıq oddan, pirotexniki qurğulardan (fişəng, partlayıcı və sair) istifadə etməyə görə - 50 manat (əlli manat) miqdarında cərimə tətbiq edilir.

Metropolitendə siqaret çəkən şəxsin kimliyi müəyyən edildikdən sonra onun İXM-in müvafiq maddəsinə uyğun cərimələnməsi gözlənilir. 

Könül Cəfərli

Bizimlə əlaqə saxlayın

Digər Cəmiyyət xəbərləri