Karate millilərimiz İsveçrə və Almaniyadakı yarışlara hazırlaşır - FOTO

Karate millilərimiz növbəti ciddi sınağına hazırlaşır. Millilərimizi bu ay İsveçrənin Bazel şəhərində IX Açıq Turnir və Almaniyanın paytaxtı Berlində Premyer Liqa gözləyir.

Oxu.Az xəbər verir ki, kişi və qadın millilərimiz həmin yarışlara Bakıda hazırlaşır.

Bu məqsədlə “ASK Arena”nın məşq zalında (köhnə “Şəfa” və “İnter Arena” – S.M.) keçirilən hazırlıq prosesini izlədik. Qadın millilərimiz məşq zalının üçüncü mərtəbəsində kişi gənclər yığmamızın üç üzvü ilə birgə hazırlıq keçir.

Baş məşqçi Anar Allahverdiyevin sözlərinə görə, buna səbəb həm qadın yığma üzvlərinin sayının azlığı, həm də oğlanların daha sürətli olmasıdır. Qadınların oğlanlarla birgə hazırlıq keçməsi buna hesablanıb.

Allahverdiyevin sözlərinə görə, yarışlara millimizin dörd üzvü gedəcək. Nuranə Əliyeva (50 kq), İlahə Qasımova (55 kq) və Fəridə Abıyeva (61 kq) Azərbaycandan, legionerimiz İrina Zaretskaya (68 kq) Ukraynadan İsveçrəyə gedəcək. 

Məşq zalının ikinci mərtəbəsində isə kumite üzrə kişi millimiz məşq keçir. Bu millimiz sentyabrın 1-2-də Bazeldəki turnirə qatılacaq. Komanda tam heyətlə məşq edir. Daha sonra komanda İsveçrədə məşq keçərək Berlinə yola düşəcək.

Baş məşqçi Şahin Xudaverdiyevdən aldığımız məlumata görə, Firdovsi Fərzəliyev (60 kq), Tural Ağalarzadə, Rafiz Həsənov (hər ikisi 67 kq), Rafael Ağayev (75 kq), Ayxan Mamayev (84 kq), Şahin Atamov və Asiman Qurbanlı (hər ikisi +84 kq) Bazel və Berlindəki yarışlarda ölkəmizi təmsil edəcək.

Həmçinin Premyer Liqa yarışına Turqut Həsənov, Pənah Abdullayev (hər ikisi 84 kq), eləcə də, Əli Cəfərovun (+84) qatılması gözlənilir. Bu üç idmançı Almaniyaya federasiya yox, öz hesabına gedəcək.

Kata millimiz isə yalnız Berlində təmsil olunacaq. Yenə bu növdə Azərbaycan adından Roman Heydərov çıxış edəcək.

Qeyd edək ki, İsveçrədəki yarış sentyabrın 1-2-si, Almaniyadakı turnir sentyabrın 14-16-da baş tutacaq. İkinci yarış Tokio Olimpiadasına vəsiqə qazanmaq üçün ilk reytinq xallarını verəcək.

Səbuhi MUSAYEV

FOTO: Sadiq FƏRZƏLİBƏY
www.oxu.az