Azər Kərimli: "Fransanın neokolonializm siyasəti humanizmə qarşı elan olunmamış müharibədir"

"Çox simvolikdir, bizim bugünkü görüşümüz məhz Xocalı soyqırımının 33-cü ildönümü günü baş tutur. 33 il əvvəl məhz 25-26 fevralda erməni faşistləri Qarabağın Xocalı şəhərinə hücum edib, bu şəhəri yerlə bir edərək 63-ü uşaq, 106-sı qadın, 70-i qoca və qarı olmaqla, 613 Xocalı sakini qətlə yetiriblər. Simvoliklik isə ondan ibarətdir ki, tarix boyu buna bənzər onlarla cinayətləri törətmiş, Əlcəzair, Mərakeş, Tunis, Mali, Cibuti, Nigeriya, Çad, Seneqal, Benin, Kot-d`İvuar, Mərkəzi Afrika Respublikası, Qabon, Toqo, Kamerun, Vyetnam, Qəmər Adaları İttifaqı, Haiti və digər ölkələrdə bir neçə milyon günahsız insan, o cümlədən qadınlar və uşaqları qətlə yetirmiş, eyni zamanda 1994-cü ildə Ruandada tutsi qəbiləsinin 800 mindən çox üzvünün öldürülməsində birbaşa məsuliyyət daşıyan Fransa erməni faşistlərini o zamanlar da dəstəkləyib, bu gün də Ermənistanın revanşist qüvvələrinə həm mənəvi, həm siyasi, həm maddi, həm də hərbi dəstək verir".

Oxu.Az xəbər verir ki, bunu Milli Məclisdə yaradılmış Korsika xalqına dəstək qrupunun üzvü, deputat Azər Kərimli Fransa müstəmləkəsində olan xalqların nümayəndələri ilə görüşdə deyib.

O bildirib ki, XXI əsrdə müstəmləkəçiliyin mövcudluğu bəşəriyyətin ən böyük problemlərindən biridir və Fransanın neokolonializm siyasəti, əslində bütün sivil bəşəriyyətə, humanizm prinsiplərinə qarşı elan olunmamış müharibədir:

"Azərbaycanın Qoşulmama Hərəkatına sədrlik etdiyi dönəmdə başlatdığı fəal müqavimət prosesi "Bandunq prinsipləri"nin yenidən fəal şəkildə təbliğ olunmasına, müstəmləkəçilikdən və neokolonializmdən əziyyət çəkən xalqların haqq səsinin ucaldılmasına zəmin yaradıb.

Prezident İlham Əliyev Qoşulmama Hərəkatının sədri kimi bir neçə dəfə Fransanın işğal etdiyi ölkələrdə həyata keçirdiyi insanlıq əleyhinə çoxsaylı cinayətləri, törətdiyi vəhşilikləri faktlarla sadalayıb və bu gün rəsmi Parisin ölkəmizə qarşı yürütdüyü aqressiv, beynəlxalq hüquqa zidd siyasətinin təməlində dayanan amillərdən biri də məhz Azərbaycanın fransız neokolonializmindən əziyyət çəkən xalqların haqq səsinə verdiyi dəstək və neoimperialist iddialara boyun əyməməsidir.

Ancaq Azərbaycan fransız neokolonializmindən əziyyət çəkən xalqlara dəstəyini davam etdirəcək və heç bir təzyiq Azərbaycan xalqının və dövlətinin iradəsinə güc gələ bilməyəcək".

Mərahim Nəsib