Kanada, ABŞ, Almaniya, Serbiya, Ukrayna, Qazaxıstan, Özbəkistan, Qambiya, Esvatini, Əfqanıstan, Pakistan və daha onlarla ölkə... Dünyanın dörd bir yanından insanlar Azərbaycan paytaxtında toplaşaraq bəşəriyyət üçün aktual problemlərdən olan məskunlaşmanı müzakirə etdilər.
Oxu.Az komandası olaraq mayın 17-dən start götürən Ümumdünya Şəhərsalma Forumunun 13-cü sessiyasının (WUF13) ilk dəqiqələrindən sonunadək heç bir mövzunu gözdən qaçırmamağa çalışdıq.
Dünyanın 176 ölkəsindən 57 mindən çox iştirakçının qatıldığı WUF13-də dialoqlar, xüsusi sessiyalar, dəyirmi masalar, qiymətləndirmələr və paralel tədbirlər daxil olmaqla 400-dən çox tədbir, eləcə də ilk dəfə olaraq Liderlər Sammiti keçirildi.
400-ə yaxın xəbər, o cümlədən özəl açıqlamalar, müsahibələr, süjetlər - bütün bunları Oxu.Az komandası altı gün ərzində operativ olaraq oxucularına çatdırdı, sosial şəbəkə istifadəçilərini də informasiya və maraqlı görüntülərlə təmin etdi. Sahədə müxbirlər, PhotoStock-un dəstəyi ilə fotoqraflar və videoqraf, səhnəarxasında tərcüməçilər, redaktorlar və sosial media mütəxəssisləri informasiyanın kəsintisiz, dolğun, düzgün şəkildə oxucuya çatdırılmasına çalışdılar.
WUF13 Ümumdünya Şəhərsalma Forumunun bu günədək keçirilmiş ən genişmiqyaslı sessiyası kimi tarixə düşdü və COP29-dan sonra ölkədə təşkil olunan ikinci ən böyük beynəlxalq tədbirdir. Bakı bir daha qlobal həmrəyliyi, beynəlxalq tərəfdaşlığı və çoxtərəfliliyi təşviq edən vacib platforma rolunu oynadı.
Əminik ki, Azərbaycan paytaxtında təşkil olunan bu möhtəşəm forum qaldırılan problemlərin həllinə böyük töhfə verəcək.
