2022-ci ildə müvafiq fərmanla yaradılan, Ekologiya və Təbii Sərvətlər Nazirliyinin tabeliyində Geodeziya və Kartoqrafiya Agentliyinin əsasnaməsi təsdiq olunub.
Oxu.Az-ın məlumatına görə, bununla bağlı müvafiq qərar imzalanıb.
Əsasnaməyə əsasən, agentliyin fəaliyyət istiqamətləri aşağıdakılardır:
- müvafiq sahədə dövlət siyasətinin formalaşdırılmasında iştirak etmək;
- müvafiq sahədə dövlət nəzarətinin və əlaqələndirmənin həyata keçirilməsinin təmin edilməsində iştirak etmək;
- müvafiq sahənin inkişafını təmin etmək;
- müvafiq sahə üzrə dövlət əhəmiyyətli coğrafi məlumat sistemlərini və coğrafi adlar üzrə kataloqlar yaratmaq, coğrafi obyektlərin uçotunu aparmaq, coğrafi xəritələri yeniləmək və bu sahədə fəaliyyətin təşkilinə dair müvafiq tədbirlər görmək;
- bu Əsasnamədə göstərilən və Azərbaycan Respublikası Prezidentinin və Azərbaycan Respublikası Nazirlər Kabinetinin aktları ilə müəyyən edilmiş digər istiqamətlərdə fəaliyyət göstərmək.
Agentliyin vəzifəsi sıralarında isə dövlət topoqrafik xəritələrinin və planlarının hazırlanmasını, ümumdövlət, müdafiə əhəmiyyətli dövlət planlarının tərtibini və yüksəklik, o cümlədən qravimetrik şəbəkələrin yaradılmasını, habelə inkişafını və işlək vəziyyətdə saxlanmasını təmin etmək üçün tədbirlər görmək müəyyənləşib.
Qurum nazirliklə, habelə Azərbaycan Respublikasının Müdafiə Nazirliyi, Azərbaycan Respublikası Prezidentinin Təhlükəsizlik Xidməti, Azərbaycan Respublikasının Dövlət Təhlükəsizliyi Xidməti və Azərbaycan Respublikasının Dövlət Sərhəd Xidməti ilə razılaşdırmaqla, aerofotoplanaalma işlərini həyata keçirmək və digər təşkilatların müəyyən olunmuş qaydada həmin məlumatlarla təmin edilməsi üçün müvafiq tədbirlər görəcək.
Bundan başqa, qurum geodeziya və kartoqrafiyanın inkişafı üçün peyk, aero (habelə pilotsuz uçuş aparatları vasitəsilə) məlumatlar əsasında yer səthinin tədqiqi işlərinin həyata keçirilməsini təmin edəcək.
Agentliyin strukturunu, işçilərin say həddini əməkhaqqılarının (vəzifə maaşları, vəzifə maaşlarına əlavələr, mükafatlar və digər ödənişlər) məbləğlərini Azərbaycan Respublikasının Nazirlər Kabineti təsdiq edir. Agentliyə ayrılmış büdcə təxsisatı daxilində əməkhaqqı fondunu və xərclər smetasını Nazirlik təsdiq edir.
Agentliyin fəaliyyətinə Azərbaycan Respublikasının ekologiya və təbii sərvətlər naziri tərəfindən vəzifəyə təyin və vəzifədən azad edilən sədr rəhbərlik edir. Agentliyin sədri Agentliyə həvalə edilmiş vəzifələrin yerinə yetirilməsi və hüquqların həyata keçirilməsi üçün şəxsən məsuliyyət daşıyır.
Agentliyin sədrinin Azərbaycan Respublikasının ekologiya və təbii sərvətlər naziri tərəfindən vəzifəyə təyin və vəzifədən azad edilən iki müavini vardır. Agentliyin sədrinin müavinləri onlara Agentliyin sədrinin həvalə etdiyi vəzifələri yerinə yetirirlər və bunun üçün şəxsən məsuliyyət daşıyırlar.
