Ən son xəbərləri bizim "X" səhifəmizdə izləyin
İmtahandan keçə bilmədiyi üçün təhqirli səsyazısı yayılan türkiyəli həkim işdən çıxarılır?
Bir müddət əvvəl Bakıda fəaliyyət göstərən uzman fizioterapevt Musa Kılıçın diplomunun saxta olması ilə bağlı xəbərlər yayılıb. Qeyd olunub ki, Gürcüstanda universitetdə təhsil alan həkimin xarici dil bilikləri sual altındadır və onun diplomları saxtadır. M.Kılıç isə haqqında yayılan məlumatları təkzib edib.
Oxu.Az xəbər verir ki, bu söhbətlər səngiməmiş türkiyəli mütəxəssislə bağlı yeni səsyazısı yayılıb.
Səsyazısında Musa Kılıçın kimisə təhqir etdiyi əks olunub: "Axmaq, orada videonun 3, 4-cü dəqiqəsində bütün diplomlar paylaşılıb. Necə arsız bir millətsiniz?! Qanınız nə qədər xarabdır?! Kimsən sən? Dövlətin mənə verdiyi diplomlarla, icazələrlə peşəmi icra edirəm".
Bu səsyazısından sonra M.Kılıç yenidən paylaşım edib. O, son paylaşımında bu fikirləri səsləndirib:
"Peşə fəaliyyətimlə bağlı gerçəkləri əks etdirməyən məlumatlar paylaşıldı, sonradan reallıq ortaya çıxdı. Azərbaycan xalqını Türkiyə xalqından ayırmıram. Dövlətlərimizi nə qədər sevdiyimi bilən bilir. Bakıda qalma səbəbim xalqımızın mənə olan sevgisindən qaynaqlanır. Dünyanın ən inkişaf etmiş müalicə üsullarını Bakıda tətbiq edirik.
Bu gün səsyazısı yayıldı, səhifəmizə hücum edildi. Haqqımızda bəzi qarayaxma kampaniyaları başladı. Hücum adı altında "rədd ol, ölkənə get" kimi mesajlar göndərənlər var. Mən onları nəzərdə tutaraq həmin cavabı vermişəm. Bütün xalqı nəzərdə tutmamışam, xalqımız mənim başımın tacıdır. Qarayaxma kampaniyası aparanlara cavabım yoxdur, artıq heç nə deməyəcəyəm. İşimlə gündəmə gəlmək istəyirəm".
Məsələyə aydınlıq gətirmək üçün M.Kılıça etdiyimiz zənglər cavabsız qaldığından diplomunun saxta olduğu bildirilən həkimin fəaliyyətini davam etdirib-etdirmədiyini öyrənmək üçün əməkdaşı olduğu "Medera Hospital"a üz tutduq.
Klinikanın Mətbuat Xidmətindən Oxu.Az-ın sorğusuna cavab olaraq bu fikirlər səsləndirilib:
"Musa Kılıç "Medera Hospital"da fəaliyyətini davam etdirir. Həkimə nazirlik tərəfindən təqdim edilmiş sənədlər klinikada var. M.Kılıçın əmək fəaliyyətini davam etdirməsi ilə bağlı lazım olan bütün sənədləri mövcuddur. Sənədsiz fəaliyyətinə necə davam edə bilər?"
Qeyd edək ki, məsələ ilə bağlı Analitik Ekspertiza Mərkəzinə (AEM) sorğu ünvanlanıb.
Xatırladaq ki, bu yaxınlarda Türkiyə vətəndaşı, uzman fizioterapevt Musa Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunub, imtahanda müvafiq keçid balını toplaya bilmədiyi üçün uğursuz nəticə əldə edib və ona Təhsildə Keyfiyyət Təminatı Agentliyi (TKTA) tərəfindən yalnız akademik tanınma şəhadətnaməsi təqdim olunub.
Məhərrəm Əliyev
Ən çox oxunanlar
