Yaz və yay aylarında evlərdə qarışqaların artması tez-tez müşahidə olunur. Lakin onların qoxuya qarşı həssaslığını nəzərə alaraq, bəzi ətirli bitkilərdən istifadə etməklə bu narahatlıqdan asanca qurtulmaq mümkündür.
Oxu.Az "The Mirror" nəşrinə istinadla qarışqaları uzaq tutan ən ekoloji və effektiv üsulları təqdim edir.
Reyhan
Bu bitki evgenol və linalool kimi güclü efir yağları vasitəsilə qarışqaları uzaqlaşdırır. Reyhanı bağçada yetişdirmək və ya otaqda saxlamaq mümkündür - hər iki üsul eyni dərəcədə effektivdir.
Otaq şəraitində istifadə üçün qarışqaların tez göründüyü künclərə təzə və ya qurudulmuş reyhan yarpaqları qoymaq tövsiyə olunur. Effekti artırmaq üçün püskürdücü şüşəyə su və bir neçə damcı reyhan efir yağı əlavə edin, pambıq toplarını bu məhlulla isladın və həşəratların çox olduğu yerlərə yerləşdirin.
Lavanda
Həm gözəl qoxusu, həm də effektiv təsiri ilə lavanda ideal seçimlərdən biridir. Onu saxsı dibçəkdə qapı və pəncərə yaxınlığında saxlamaq məsləhətdir. Əlavə olaraq, lavanda efir yağından da istifadə etmək mümkündür.
Rozmarin
Bu bitki də qarışqaların xoşlamadığı kəskin qoxuya malikdir. Təzə rozmarin budaqlarını mətbəx səthlərinə, pəncərə və qapı kənarlarına yerləşdirməklə həşəratların yaxınlaşmasının qarşısını almaq olar.
Qeyd edək ki, bu bitkilər təkcə qarışqaları deyil, eyni zamanda evi xoş ətirlə təmin edir və estetik görünüş qazandırır.
