Sabunçu rayonunda yerləşən və sakinlər tərəfindən narkotik istifadəçilərinin toplandığı məkan kimi təqdim olunan köşk-vaqon tipli tikili ilə bağlı tədbir görülüb.
Oxu.Az-ın məlumatına görə, tikilinin daxilində antisanitar şərait hökm sürüb, ərazidə istifadə olunmuş şprislər və müxtəlif məişət tullantıları toplanıb.
Məsələ ilə bağlı Oxu.Az-ın sorğusuna cavab olaraq Daxili İşlər Nazirliyinin (DİN) Mətbuat Xidmətinin əməkdaşı Cəsarət Qənbərli bildirib ki, qeyd olunan ünvana polis əməkdaşları cəlb olunublar.
Onun sözlərinə görə, narkotik vasitə istifadə edən və tüfeyli həyat tərzi sürən şəxslərə qarşı bütün zəruri tədbirlər görülüb.
"Eyni zamanda, həmin ünvanda yaranmış antisanitar vəziyyət də aradan qaldırılıb. Ərazi polis naryadları tərəfindən nəzarətə götürülüb", - deyə C.Qənbərli əlavə edib.
