Bakı şəhəri, Sabunçu rayonu, Nazim İsmayılov prospekti 369 ünvanında su sayğacının olmaması məsələsinə aydınlıq gətirilib.
Oxu.Az-ın sorğusuna cavab olaraq İri Şəhərlərin Birləşmiş Su Təchizatı Xidmətindən bildirilib ki, sözügedən ünvanın ümumi girişində sayğac var və ümumi sərfiyyata əsasən aylıq məbləğ ödənilir:
"Binadakı sakinlərin ayrılıqda sayğacı yoxdur.
Qeyd olunan ünvanda abonentlərin ayrı-ayrılıqda sayğaclaşdırılması üçün yaşayış binasının sahibi xidmətə və ya müvafiq rayon sukanal idarəsinə binanın istismara qəbul olunması ilə bağlı müraciət etməlidir".
Bakı şəhəri, Sabunçu rayonu, Nazim İsmayılov prospekti, 369 ünvanındakı binanın sakinləri işıq, su, qaz sayğaclarının adlarına keçirilməməsindən şikayətçidirlər.
Bu barədə Oxu.Az-a şikayət ünvanlayan Zeynəb Şıxəliyeva məlumat verib.
O bildirib ki, iş adamı Rövşən Hüseynovun apartman tipli binasından 2021-ci ildən ev alıb və təmir etdirib. 2023-cü ildən etibarən həmin evdə yaşamağa başlayıb:
"Notarius da alqı-satqı müqaviləsi ilə bizə bu evi satılıb. Evi aldıqdan sonra 30 gün müddətində sənədlər hazırlanıb, çıxarışımı götürmüşəm. Fərdi-paylı çıxarış verilib. Biz bura köçəndən bu yana işıq, qaz, su üçün ödənişləri komendant Səxavətin bank kartına ödəniş edirik, o da müvafiq qurumlara ödədiyini deyir, amma bizə heç bir çek təqdim olunmur. Heç bir sayğac adımıza deyil.
Bir müddət sonra sayğac qoydular, onların da bazardan alınma olduğunu bildirirlər. Hər dəfə deyəndə bizim sayğacları adımıza keçirin bəhanə gətirirlər ki, düzələcək. Burada 13-14 ailə yaşayır. Hamı eyni vəziyyətdən şikayətçidir. Bizim şikayət etdiyimizi biləndə komendant bizi hədələdi ki, siz şikayət etmisiniz, bundan sonra işıq, qaz, suyunuz kəsiləcək, üstəlik qanunsuz olaraq biz sənədlərimizi tələb etdiyimiz halda bizdən kommunal ödəniş istəyir. Cibimizdən verib qoydurduğumuz domofonu ayırıb, bloku işıqsız qoyub. Heç kimi evimizə qeydiyyata sala bilmirik. İndi nə adımıza sayğac verirlər, nə də qeydiyyata ailə üzvlərimizi sala bilirik".
Məsələ ilə bağlı sözügedən komendant Səxavət Piriyev Oxu.Az-a açıqlamasında bildirib ki, sözügedən ünvanda sayğaclar artıq quraşdırılıb, yaxın günlərdə abonent kodları vətəndaşların adlarına keçirilərək onlara təhvil veriləcək:
"Bütün bunlar proseslə olan şeylərdir. Birdən-birə icra edilmir. Bütün sayğaclar quraşdırılıb. İşığın, suyun, qazın sayğacı qoyulub, yüksək səviyyədə də təmin olunub vətəndaşların istifadəsinə verilib. Burada bircə abonent kodlarının verilməsi qalıb, yaxın günlərdə həmin kodlar sakinlərin adlarına keçiriləcək".
Komendant paylı çıxarış verilməsi məsələsinə aydınlıq gətirilib:
"Sakinlərin yaşadığı ünvandakı mənzillər apartman tipli mənzillərdir. Bu tip mənzillərdə alqı-satqı zamanı paylı çıxarış verilir. Özləri nə vaxt istəsələr, toplaşıb ərizə ilə məhkəməyə müraciət edib sənədlərini ala bilərlər. Burada çətin bir məsələ yoxdur".
Səxavət Piriyev hədələmə iddialarının əsassız olduğunu bildirib:
"Hansı dövrdə yaşayırıq ki, kimsə, kimisə hədələsin? Müstəqil ölkədə yaşayırıq. Qayda-qanun var, bu qaydalar əsasında da işlərimizi görürük".
Aygün Mirakif
