"Bu gün evlər qeydiyyatda olmadığı üçün bələdiyyəyə verilməli olan əmlak vergisi ödənilmir".
Oxu.Az xəbər verir ki, bu fikirləri Milli Məclisin Regional məsələlər komitəsinin sədri Siyavuş Novruzov parlamentin bugünkü iclasında deyib.
O bildirib ki, əsas məsələ bələdiyyələrin topladıqları vəsaitlərin çox olması və bu vəsaitin də əhalinin problemlərinin həll olunmasına yönəldilməməsi ilə əlaqədardır:
"Öz evləri qeydiyyatda deyil və onlar bələdiyyəyə ildə bir dəfə əmlak vergisi verməlidirlər. Amma vergini vermirlər. Nəticə etibarilə, 300 min-500 min evdən bu gün bələdiyyələr vergi yığa bilmirlər. Ona görə də hesab edirik ki, bu məsələ Vergi Məcəlləsində və digər məcəllələrdə nəzərə alınmalıdır və müvafiq addımlar atılmalıdır.
İkincisi, fiziki şəxsdən və hüquqi şəxsdən eyni bələdiyyə vergisi verilir. Halbuki başqa sahələrdə, suda, qazda, işıqda fiziki şəxslə hüquqi şəxsin vergisi üç dəfə fərqlənir. Amma bələdiyyələrdə ikisində də eyni vergi nəzərdə tutulub. Bu da bələdiyyələrin maddi fondunun yaxşılaşdırılmasına imkan yaratmır.
Bələdiyyələrin xəritələri - bələdiyyələr 27 ildir təşkil olunmasına baxmayaraq - hələ də verilməyib. Bilirsiniz ki, Prezident tərəfindən böyük bir müşavirə keçirildi, neft-qaz sektorundan başqa, digər sənaye sahələrinin istismarı nəzərdə tutulub. Bunlardan da bələdiyyə ərazilərinə düşənlər var. Bələdiyyə xəritələri verildikdən sonra bu məsələlər dəqiqləşdirilməlidir. Biz Nazirlər Kabineti qarşısında dəfələrlə məsələ qaldırmışıq. Hələ indiyə qədər xəritələr bələdiyyələrə təqdim olunmayıb. Ona görə bu məsələyə də diqqət yetirilməlidir".
