Baku TV-nin qaynar xəttinə Yasamal rayonu ərazisində yerləşən "Meqa Park" Uşaq Bağçasında azyaşlılara qarşı fiziki və psixoloji zorakılıq göstərildiyi iddiaları ilə bağlı müraciət daxil olub.
Şikayətdə bağçada uşaqların üzərinə qışqırıldığı, ağlama səslərinin tez-tez eşidildiyi və bəzi hallarda azyaşlıların şiddətə məruz qaldığı iddia olunub.
Məsələni araşdırmaq üçün bağçaya üz tutan Baku TV əməkdaşları müəssisə rəhbərliyinin mövqeyini öyrənməyə çalışıblar.
Uşaq bağçasının müdiri Səidə Kərimova səsləndirilən iddiaları əsassız adlandıraraq bildirib ki, müəssisədə 24 saat fəaliyyət göstərən müşahidə kameraları quraşdırılıb və görüntülərə valideynlər də çıxış əldə edə bilirlər.
"Kameralar valideynlərin telefonlarına bağlıdır. Əgər burada hansısa problem yaşansaydı, valideynlər bunu dərhal görər və müvafiq addım atardılar", - deyə o qeyd edib.
Bəzi valideynlər isə səsləndirilən iddialarla razılaşmadıqlarını bildiriblər. Onların sözlərinə görə, müəllim və tərbiyəçilərin uşaqlara münasibəti qənaətbəxşdir və indiyədək hər hansı xoşagəlməz hadisə ilə qarşılaşmayıblar.
