Suraxanı rayonunda bəzi küçələrin asfaltlanmaması sakinlərin haqlı narazılıqlarına səbəb olub.
Oxu.Az-a daxil olan şikayətdə bildirilib ki, Elnur Şahbazov küçəsi, 4-cü döngə (3-cü köndələn) hələ də bərbad vəziyyətdə qalır.
Sakinlərin sözlərinə görə, küçə uzun illərdir asfaltlanmayıb və bu, həm nəqliyyatın hərəkətini, həm də onların gündəlik həyatını çətinləşdirib.
"Bu problemin həlli üçün dəfələrlə aidiyyəti qurumlara, o cümlədən Suraxanı Rayon İcra Hakimiyyətinə müraciət etmişik. Bütün məhəllə yığışıb icra hakimiyyətinə getdik, amma nəticə olmadı. Bizi yol idarəsinə yönləndirdilər, orada isə - "məktub yazın", - dedilər. Məktub da yazmışıq, amma heç bir cavab yoxdur. Hər dəfə bir qapıya yönləndirirlər, bezmişik", - deyə şikayətdə qeyd olunub.
Şikayətçi, həmçinin küçədə təhlükə yaradan digər problemdən də sakinlərin narahat olduqlarını vurğulayıb:
"Yolda elə yer var ki, elektrik xətlərinin üstü açıq qalıb. Uşaqlar küçədə oynayırlar, hamısı azyaşlıdır. Valideyn olaraq çox narahat oluruq".
Məsələ ilə bağlı Oxu.Az-ın sorğusuna cavab olaraq Suraxanı Rayon İcra Hakimiyyətindən bildirilib ki, rayon ərazisində asfaltlanmasına ehtiyacı olan küçələrin təmir olunması ilə bağlı vətəndaşların müraciəti əsasında tərəfimizdən aidiyyəti üzrə Avtomobil Yolları Dövlət Agentliyinə müvafiq məktublar ünvanlanıb.
"Həmçinin elektrik xəttinin üstünün açıq olması ilə bağlı məsələnin araşdırılaraq lazımi tədbir görülməsi üçün tərəfimizdən Suraxanı Rayon Enerji Təchizatı və Satış İdarəsinə tapşırıq verilib və məsələ nəzarətimizdədir", - deyə məlumatda qeyd olunub.
Oxu.Az-a açıqlamasında Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli bildirib ki, sözügedən küçə agentliyin balansında deyil.
"Küçənin bir hissəsi 2022-ci ildə Dövlət İnvestisiya Proqramına salınaraq təmir olunub, digər hissəsinin təmiri üçün isə yenidən icra hakimiyyəti tərəfindən Dövlət İnvestisiya Proqramına salınması üçün müraciət olunmalıdır. Müraciət isə AAYDA-ya yox, aidiyyəti üzrə edilməlidir. Çünki agentlik balansında olmayan yollarda hər hansı təmir işlərinin aparılmasına qərarvermə səlahiyyətinə malik deyil. Yalnız Dövlət İnvestisiya Proqramına salındıqdan sonra işin icrası bizə tapşırılır və biz ərazidə lazımi işləri həyata keçiririk", - deyə A.Nəcəfli bildirib.
Elnur Şahbazov küçəsində elektrik xəttinin üstünün açıq olması məsələsinə gəlincə isə, "Azərişıq" ASC-dən Oxu.Az-ın sorğusuna cavab olaraq bildirilib ki, həmin hissədə yağış suları yolda çuxur yaradıb və izolyasiyalı naqillərin keçdiyi plastik boru az bir hissədə görünür:
"Müraciət əsasında əməkdaşlarımız tərəfindən əraziyə baxış keçirildi. Qeyd edək ki, görünən naqillər yox, onları izolyasiya edən plastik borudur, bu isə heç bir təhlükə yaratmır. Sakinlərin narahatlığını nəzərə alıb, həmin hissə betonla örtüldü və problem aradan qaldırıldı".
Əzizə İsmayılova
