Zaqatalada selin fəsadları: 250-yə yaxın evin həyətyanı sahəsini su basdı, tədris dayandırıldı

Zaqatalada orta məktəb və uşaq bağçasında tədris bir günlük dayanıb.

APA-nın Şimal-qərb bürosunun məlumatına görə, Zaqatala rayonu A.Qurbanov adına Üçüncü Tala kənd tam orta məktəbində və kənd bağçasında tədris bir günlük dayandırılıb.

Buna səbəb kimi ötən gün kəndə yağan leysan nəticəsində məktəbin və bağçanın həyətyanı sahəsinə yağış sularının dolmasıdır.

Hazırda əraziyə müvafiq qurumların əməkdaşları cəlb ediliblər.

Məktəb və bağçanın həyətyanı sahəsindən suyun kənarlaşdırılması işləri aparılır.

08:30

Güclü yağış səbəbindən Zaqatalada 250-yə yaxın evin həyətyanı sahəsini sel suları basıb.

APA-nın Şimal-qərb bürosunun məlumatına görə, mayın 20-si axşam saat 22 radələrindən başlayaraq Zaqatala rayonu ərazisində leysan yağıb, rayon mərkəzidə daxil olmaqla ətraf yaşayış məntəqələrinə 3-4 dəqiqə ərzində dolu düşüb.

Leysan gecə saatlarında rayon mərkəzindən 25 km uzaqlıqda yerləşən Üçüncü Tala kəndinin inzibati ərazisində daha çox müşahidə olunub.

Kəndin inzibati ərazisinə yağan güclü leysan səbəbindən kənddaxili və kəndin ətrafındakı kiçiktutumlu çaylarda və kanallarda sel sularının yaranmasına səbəb olub.

Sel suları kəndin 250-yə yaxın həyətyanı sahəsinə dolub, 20-dən çox evin zirzəmisinə və yaxud birinci mərtəbəsinə yağış suları dolub.

Leysan yağışı üzündən kənd sakinlərinin xeyli sayda toyuq-cücəsi tələf olub.

Hazırda müvafiq qurumun nümayəndələri ərazidə leysanın yaratdığı fəsadları aradan qaldırmaq istiqamətində işlər aparır, əhaliyə dəymiş ziyanın miqyasını müəyyənləşdirirlər.

Zaqatalada selin fəsadları: 250-yə yaxın evin həyətyanı sahəsini su basdı, tədris dayandırıldı