İranın xarici işlər naziri Abbas Əraqçı fransalı həmkarı Jan-Noel Barro ilə telefon danışığı zamanı Tehranda iki Fransa diplomatının diplomatik normaları pozan hərəkətlərini qəbuledilməz hesab etdiyini bildirib.
Oxu.Az xəbər verir ki, bu barədə Əraqçının rəsmi "Telegram" kanalında yayımlanan açıqlamada deyilir.
İran XİN rəhbəri "Tehrandakı iki diplomatın qeyri-peşəkar hərəkətlərinə" etirazını ifadə edib. Əraqçı vurğulayıb ki, qəbul edən ölkənin qanunlarına və diplomatiyanın tanınmış prinsiplərinə riayət etmək xarici nümayəndəliklərin fəaliyyətinin davam etdirilməsi üçün zəruri şərtdir.
O, Fransa tərəfini bu cür halların təkrarlanmaması üçün tədbirlər görməyə çağırıb.
Fransanın xarici işlər naziri Jan-Noel Barro daha əvvəl İran ərazisində iyulun 19-da iki fransalı diplomatın saxlanıldığını açıqlamışdı. Nazir bildirib ki, diplomatlar İranda "vətəndaş cəmiyyətinə dəstək" məqsədli Fransa proqramlarının, o cümlədən bəzi iranlı alim və sənətçilərlə bağlı layihələrin həyata keçirilməsi ilə məşğul olublar.
Onun sözlərinə görə, diplomatlar bir neçə saat saxlanılıb, sorğu-sual edilib və onlardan biri ilə kobud rəftar olunub. Daha sonra onlar sərbəst buraxılıb və yaxın vaxtlarda Fransaya qayıtmalıdırlar.
