ABŞ Kanadaya qarşı rüsumların tətbiqini dayandırır

ABŞ administrasiyası Kanada ilə ticarət sazişi bağlamaq üçün bu ölkədən gələn mallara idxal rüsumlarının tətbiqini 30 gün müddətinə dayandıracaq.

Oxu.Az-ın verdiyi məlumata görə, bu barədə Ağ Ev rəhbəri Donald Tramp özünün "Truth Social" sosial şəbəkəsində xəbər verib.

O, ilk nəticədən çox məmnun olduğunu vurğulayıb.

"Şənbə günü elan edilən rüsumlar Kanada ilə yekun iqtisadi sazişin əldə edilib-edilməyəcəyini görmək üçün 30 gün müddətinə dayandırılacaq. Hamı üçün ədalət", - deyə o paylaşımında qeyd edib.

Kanadanın Baş naziri Castin Trüdo da özünün "X" sosial şəbəkə hesabından bu məlumatı təsdiqləyib.

"Təklif olunan tariflərin tətbiqi ən azı 30 gün müddətinə dayandırılacaq", - deyə hökumət başçısı bildirib.

Xatırladaq ki, şənbə günü Tramp Kanada, Çin və Meksikadan gələn mallara tariflərin tətbiq edilməsi barədə icra fərmanı imzalayıb. Sənədə əsasən, Meksika və Kanadadan idxala 25% (Kanada enerji resurslarına 10%) rüsum tətbiq edilir. Çin mallarına isə tətbiq edilən əlavə tarif 10% təşkil edəcək.

Birləşmiş Ştatların idxal etdiyi mal və xidmətlərin üçdə biri Kanada, Çin və Meksikanın payına düşür. 2023-cü ildə bu üç ölkənin ABŞ-yə ixracının ümumi həcmi təxminən 1.5 trilyon dollar təşkil edib.