Sentyabrın 8-dən etibarən Kanada ABŞ mallarına qarşı 50% həcmində rüsumlar tətbiq etməyə başlayıb.
Oxu.Az BBC-yə istinadən xəbər verir ki, bu addım Birləşmiş Ştatların müvafiq qərarlarına cavab olaraq atılıb.
Poladdan tutmuş köynəklərə qədər təqribən 20 milyard ABŞ dolları dəyərində məhsullar bu məhdudiyyətlərin təsiri altına düşüb.
Əvvəlcə siyahıya təzə balıq və omar (dəniz xərçəngi növüdür - red.) da daxil edilmişdi, lakin yerli balıqçıların etirazları səbəbindən onlar siyahıdan çıxarılıb. Bu vəziyyət Ottavanın ölkə daxilində tarazlığı qoruyaraq Vaşinqtona cavab verməsinin nə qədər çətin olduğunu nümayiş etdirir.
Hər iki tərəfin rəsmiləri razılığa gəlmək istədiklərini bildirirlər. Buna baxmayaraq, avqustun sonlarında baş verən fasilədən sonra yeni danışıqlara hələ də başlanılmayıb.
Kanadanın Baş naziri Mark Karni bu yaxınlarda ölkəsinin ABŞ ilə uzunmüddətli razılaşmaya hələ də ümid etdiyini vurğulayıb. O qeyd edib ki, ABŞ-lilər hazır olan kimi ölkəsi dialoqa başlamağa hazırdır.
ABŞ-nin ticarət nümayəndəsi Ceymison Qrir isə əksinə olaraq, növbənin kanadalılarda olduğunu bildirib. O diqqətə çatdırıb ki, Birləşmiş Ştatlar daha sərfəli şərtlər təklif edib, lakin Ottava bundan imtina edib. Rəsmi şəxs həmçinin cavab tədbirləri ilə hədələyərək, Vaşinqtonun bəzi Kanada mallarının idxalına qadağa qoya biləcəyi barədə xəbərdarlıq edib.
