ABŞ məhkəməsi ölkə rəsmilərinin husilərə endirəcəkləri zərbələrlə bağlı müzakirələr apardığı "Signal" söhbət çatındakı mesajlarının saxlanılmasına qərar verib.
Bu barədə Oxu.Az xarici KİV-ə istinadən xəbər verir.
Məlumata görə, bu qərar çatdan mesajların silinməsinin hökumət sənədlərinin saxlanılması qaydalarını pozduğunu iddia edən ABŞ-nin "American Oversight" insan haqları təşkilatının müvafiq tələbindən sonra verilib. "American Oversight" iddia edib ki, müvafiq icazə olmadan "Signal"dan istifadə edilməsi federal hökumətin qeydləri haqqında qanunu pozur.
Hakim Ceyms Boasberq qərar verib ki, iddia üzrə cavabdeh şəxslər yazışmaların saxlanılması üçün bütün tədbirləri görməlidirlər.
Bildirilir ki, məhkəmə qərarı Pentaqonun rəhbəri Pit Heqset, Milli Kəşfiyyatın direktoru Tulsi Qabbard, Mərkəzi Kəşfiyyat İdarəsinin direktoru Con Retkliff, maliyyə naziri Skott Bessent və dövlət katibi Marko Rubioya şamil edilir. Qərara əsasən, onlar martın 11-dən 15-nə qədər, yəni rəsmilərin Yəmən husilərinə qarşı hücumu planlaşdırdığı zamana aid olan yazışma məlumatlarını qorumalıdırlar.
Həmçinin qeyd edilir ki, daha əvvəl çat parametrlərinin bütün yazıların dərc edildikdən bir həftə sonra avtomatik olaraq silinməsi üçün konfiqurasiya edildiyi güman edilirdi. Lakin sonradan məlum olub ki, ABŞ-nin milli təhlükəsizlik müşaviri Mayk Uolts bu parametrləri dəyişdirib və yazışmalara dörd həftə ərzində baxılması mümkündür.
Xatırladaq ki, ABŞ-nin "American Oversight" insan haqları təşkilatı ölkənin müdafiə naziri Pit Heqset, milli kəşfiyyatın direktoru Tulsi Qabbard və daha üç nəfərə qarşı Kolumbiya dairəsinin federal məhkəməsində iddia qaldırıb. Buna səbəb onların Yəmən husilərinə qarşı hərbi əməliyyatları müzakirə etmək üçün "Signal" mesencerindən istifadə etmələri olub. Heqset və Qabbarddan başqa, Mərkəzi Kəşfiyyat İdarəsinin direktoru Con Retkliff, ABŞ-nin maliyyə naziri Skott Bessent, dövlət katibi Marko Rubio, həmçinin Milli Arxivlər və Sənədlər İdarəsi (NARA) də iddiada cavabdeh qismində göstərilib. İddiaçıların sözlərinə görə, bu və ya digər məsələlərin müzakirəsi üçün mesencerlərdən istifadə edildiyi zaman dövlət qulluqçuları mesajların surətini çıxarmalı və rəsmi informasiya sisteminə ötürməlidirlər.
