Pentaqon rəhbəri və yüksəkvəzifəli şəxslər məhkəməyə verildilər: Qrup çatındakı söhbətlərinə görə

ABŞ-nin "American Oversight" insan haqları təşkilatı ölkənin müdafiə naziri Pit Heqset, milli kəşfiyyatın direktoru Tulsi Qabbard və daha üç nəfərə qarşı Kolumbiya dairəsinin federal məhkəməsində iddia qaldırıb.

Buna səbəb onların Yəmən husilərinə qarşı hərbi əməliyyatları müzakirə etmək üçün "Signal" mesencerindən istifadə etmələri olub.

Oxu.Az-ın TASS-a istinadən xəbərinə görə, iddianın mətni təşkilatın saytında yerləşdirilib.

"American Oversight"ın icraçı direktoru Çioma Çukvu məhkəmə iddiası ilə bağlı şərh verib.

"Konfidensial hərbi məlumatların jurnalistin iştirak etdiyi "Signal"ın qrup çatında açıqlanmasına dair xəbərlər hökumət üçün həyəcan siqnalıdır və potensial olaraq cinayət kimi qiymətləndirilə bilər. Emojilərlə dolu, silinə bilən qrup çatları döyüş əməliyyatlarının planlaşdırılması yeri deyil", - deyə Çioma Çukvu bildirib.

Heqset və Qabbarddan başqa, Mərkəzi Kəşfiyyat İdarəsinin direktoru Con Retkliff, ABŞ-nin maliyyə naziri Skott Bessent, dövlət katibi Marko Rubio, həmçinin Milli Arxivlər və Sənədlər İdarəsi (NARA) də iddiada cavabdeh qismində göstərilib.

Sənəddə bildirilib ki, yuxarıda adı çəkilən şəxslərin və NARA nümayəndələrinin hərəkətləri hökumət məlumatlarının və fərdi qeydlərin mühafizəsini təmin edən ABŞ qanunlarını pozur. Qeyd olunub ki, Yəməndəki əməliyyatın müzakirə edildiyi "Signal" çatı müəyyən müddətdən sonra mesajları avtomatik silmək üçün konfiqurasiya edilib.

İddiaçıların sözlərinə görə, bu və ya digər məsələlərin müzakirəsi üçün mesencerlərdən istifadə edildiyi zaman dövlət qulluqçuları mesajların surətini çıxarmalı və rəsmi informasiya sisteminə ötürməlidirlər. "American Oversight"ın nümayəndələri məhv edilmiş qeydlərin bərpasına və gələcəkdə onların iddiada adı çəkilən şəxslər tərəfindən qorunub saxlanmasına nail olmaq niyyətindədirlər.

"Bizim iddiamız hökumət sənədlərinin saxlanmasının və bərpasının təmin edilməsinə yönəlib. ABŞ xalqı cavablara layiqdir və biz onları əldə edənə qədər dayanmayacağıq", - deyə Çioma Çukvu əlavə edib.

Qeyd edək ki, martın 24-də "The Atlantic" jurnalının baş redaktoru Cefri Qoldberq bununla bağlı məqalə dərc edib. O, məqalədə bildirib ki, martın 11-də Mayk Uolts (ABŞ prezidentinin milli təhlükəsizlik məsələləri üzrə müşaviri) ləqəbli istifadəçidən "Signal" mesencerinə qoşulmaq üçün sorğu alıb. İki gün sonra jurnalist qrup çatına qoşulması ilə bağlı bildiriş alıb, hansı ki, orada ABŞ administrasiyasının üzvləri Yəmənə zərbələri müzakirə ediblər.

Jurnalistin sözlərinə görə, martın 15-də Pit Heqset (Pentaqon rəhbəri) adlı istifadəçi Yəməndə "Ənsar Allah" üsyançı hərəkatının husilərinə qarşı planlaşdırılan zərbələrin təfərrüatını, o cümlədən hədəflər, silahlar, həmçinin zərbələrin gözlənilən başlama vaxtlarını özündə əks etdirən mesaj dərc edib. Qoldberqin sözlərinə görə, bu, bombalanma ilə bağlı sosial şəbəkələrdə ilk paylaşımların vaxtı ilə üst-üstə düşüb.

ABŞ Prezidenti Donald Tramp isə sözügedən qrupda məxfi məlumatların dərc olunmadığını bəyan edib. O qeyd edib ki, məlumatların sızdırılması qalmaqalına baxmayaraq, özünün milli təhlükəsizlik məsələləri ilə məşğul olan komandasının bütün üzvlərinə, o cümlədən Uoltsa etibarını qoruyur. Uolts, öz növbəsində, bildirib ki, Qoldberqin niyə qapalı qrupa daxil edildiyini bilmir, baxmayaraq ki, sonradan hadisəyə görə məsuliyyəti öz üzərinə götürüb.